7-mavzu: missionerlik va prozelitizm: tarix va bugun, targ’bot usullari reja

Missionerlikning oldini olish bo‘yicha bugungi kunda olib borilayotgan amaliy ishlar haqida nima deyish mumkin?
Eng avvalo, mamlakatimizdagi barqaror ijtimoiy-iqtisodiy vaziyat, olib borilayotgan kuchli va tizimli ijtimoiy muhofaza siyosati, milliy g‘oya konsepsiyasining ishlab chiqilgani va unga asoslangan holda olib borilayotgan mafkuraviy tarbiya va ma’naviy-ma’rifiy targ‘ibot ishlari, xalqimizning o‘z e’tiqodida mustahkamligi missionerlik harakatlari yo‘lida jiddiy to‘siq bo‘lib xizmat qilayotganini ta’kidlash zarur.
Bizga qo‘shni bo‘lgan ayrim davlatlardan farqli ravishda, jumladan, mehribonlik uylari davlat qaramog‘ida va himoyasida ekani, yosh avlodni jismonan baquvvat va ma’naviy barkamol qilib tarbiyalash yo‘lida olib borilayotgan tizimli ishlar ham bunday harakatlarning oldini olishga xizmat qilmoqda. Bunday harakatlar Konstitutsiyamizning 64-moddasida mustahkamlab qo‘yilgan davlat va jamiyat etim bolalarni va ota-onalarining vasiyligidan mahrum bo‘lgan bolalarni boqish, tarbiyalash va o‘qitishni ta’minlaydi, degan qoidalarning hayotiy-amaliy ifodasidir.
Ammo missionerlar o‘z ishlarini mamlakatimizdagi vaziyatga moslashgan holda tashkil qilishga urinayotganliklarini ham yoddan chiqarmaslik lozim. Jumladan, ayrim xristian diniy tashkilotlarida ibodatlarni o‘zbek va boshqa mahalliy tillarda olib borish yo‘lidagi harakatlar batamom to‘xtadi, deb bo‘lmaydi. Xususan, pyatidesyatniklar yo‘nalishi vakillari ko‘pgina ogohlantirish va ma’muriy choralarga qaramay yurtimizda o‘zlarining missionerlik faoliyatini davom ettirishga intilmoqda. Jumladan, yakshanba kunlari o‘zbek tilida ma’ruzalar, qo‘shimcha “Bibliya” o‘qish darslari tashkil qilish yo‘lidagi harakatlar, «Hosil yig‘ish kuni» deb ataladigan va har bir a’zo cherkovga yangi odam olib kelishini rag‘batlantirishga qaratilgan amaliyotning mavjudligi ham shunday xulosa chiqarish imkonini beradi.
SHu bilan birga, maxsus diniy adabiyotlarni noqonuniy ravishda respublikamizda chop qilish yoki mamlakatimiz hududiga olib kirish va tarqatish yo‘lidagi urinshlar ham, afsuski, to‘xtagani yo‘q. Mazkur holat ham, ushbu yo‘nalishdagi ishlar yanada izchil davom ettirilishi zarurligini ko‘rsatadi.