1-расм. Ҳудудда аҳолини ижтимоий ҳимоя қилиш модели.
Аҳолини ижтимоий ҳимоялашни бошқаришнинг таклиф этилаётган модели аҳолини ижтимоий ҳимоялаш соҳасидаги давлат сиёсатини такомиллаштириш, ижтимоий хизматларни бошқариш самарадорлигини ошириш ва давлат ижтимоий хизматларини кўрсатишнинг сифатини яхшилашни назарда тутади.
Аҳолини ижтимоий ҳимоялаш бўйича тегишли вазирликнинг тузилмасига мос келувчи ягона модель бўйича ҳудудий органларни шакллантириш; ҳудудий органлар таркибида ижтимоий қўллаб-қувватлаш масалалари бўйича “ягона дарча” тамойили бўйича ишловчи мижозлар хизматларини ташкил этиш; давлат хизматларини кўрсатиш маъмурий регламентларининг қулайлилик стандартларига мувофиқ фуқароларни қабул қилиш учун қулай шароитларни яратиш, бизнингча, қуйидагиларни таъминлаш имконини беради:
– фуқароларнинг алоҳида тоифаларини ижтимоий қўллаб-қувватлаш соҳасида давлат хизматларини кўрсатиш сифатини ошириш;
– кекса ёшдаги фуқаролар, ногиронлар, болали оилалар, қийин турмуш вазиятига тушиб қолган фуқароларга ижтимоий хизмат кўрсатиш давлат стандартларини бажариш;
– аҳолининг ижтимоий хизматларга бўлган эҳтиёжларини қондириш;
– бюджет хизматларини кўрсатиш ва фуқароларнинг алоҳида тоифаларини ижтимоий ҳимоялашга йўналтириладиган бюджет маблағларидан фойдаланиш самарадорлигини ошириш.
Тадқиқотлар шуни кўрсатмоқдаки, аҳолини ижтимоий ҳимоялаш соҳасида бошқарувнинг янги ташкилий-иқтисодий механизмини шакллантиришни механизмнинг таркибий унсурлари ўртасидаги ўзаро муносабатлар хусусиятини ва уларнинг тизимни бошқариш жараёнидаги ролини ўзгартиришга йўналтириш лозим.
Ушбу механизмни яратиш, бизнингча, қуйидаги тадбирларни амалга ошириш асосида минтақа аҳолисини ижтимоий ҳимоялаш тизимини бошқаришнинг асосий субъекти сифатида давлат ҳокимияти органларининг ролини такомиллаштиришни назарда тутади:
биринчидан, солиқ, кредит, бюджет механизмлари ҳамда давлат буюртмаси механизми ёрдамида хўжалик юритувчи субъектлар, нотижорат ташкилотлар, шунингдек, алоҳида уй хўжаликларини ўзларининг аҳолини ижтимоий ҳимоялаш тизимини бошқаришдаги иштирокини оширишга фаол рағбатлантириш;
иккинчидан, давлат органларининг ижтимоий ёрдам кўрсатишга нисбатан ёндашувларини ўзгартириш, бу ижтимоий имтиёзлар ва субсидияларни оддий молиялашдан воз кечилишини, бандликни ва ўзини ўзи банд қилишни рағбатлантиришга йўналтирилган ижтимоий дастурларнинг кенг қўлланишини, аҳолининг даромад олишини таъминловчи шахсий ташаббусни ривожлантиришни ва инсонлар эҳтиёжларининг қондирилишини назарда тутади;
учинчидан, Ўзбекистон Республикаси субъектининг давлат ҳокимияти органларига натижалар бўйича бошқариш тамойиллари ва тартиботларини жорий этиш мақсадга мувофиқдир.
Do'stlaringiz bilan baham: |