6-Mavzu: Germenevtika, ilmiy ratsionallik va ilmiy tadqiqot mutanosibligi. Reja: 1

5. Axborot inqilobi. Nanotexnologiyalar
Axborot inqilobi. 1981 yilda birinchi shaxsiy kompyuter paydo bо‘lishi bilan boshlangan axborot inqilobi (u kompyuter inqilobi deb ham ataladi) jahonning aksariyat mamlakatlarida odamlar turmush tarzini va ularning mehnati xususiyatini butunlay о‘zgartirib yubordi. Bu inqilobning о‘ziga xos xususiyati shundaki, axborot muhim resursga, hozirgi dunyo jarayonlarini boshqarishning zaruriy omiliga aylandi. Uning natijasi о‘laroq, nafaqat chiqindisiz, energiya va resurslarni asrovchi texnologiyalar paydo bо‘ldi, balki iqtisodiy faoliyatning о‘zi ham ishlab chiqarishning maydalanishi va tabaqalanishi tomonga о‘zgardi. Masalan, hozirgi vaqtda AQSH eksportining atigi yetti foizi 500 dan ortiq odam ishlaydigan korxonalarda yaratiladi. Qolgan barcha mahsulotlarni kichik jamoalar, ba’zan bir necha kishi ishlaydigan о‘rta va kichik kompaniyalar ishlab chiqaradi. Yangi texnologiyalar va xalqaro mehnat taqsimoti sharofati bilan endilikda global iqtisodiyotda muhim rol о‘ynash uchun katta mamlakat bо‘lish shart emas. Bunga о‘z yutuqlari bilan ham, chuqur iqtisodiy tangliklari bilan ham jahon iqtisodiyotining umumiy holatiga sezilarli darajada ta’sir kо‘rsatayotgan Singapur, Tayvan, Janubiy Koreya kabi mamlakatlar misol bо‘lishi mumkin.
Yangi texnologiyalar va axborot inqilobi odamlarning atrof muhitda, ijtimoiy va siyosiy hayotda yuz berayotgan о‘zgarishlar ustidan nazorat olib borish borasidagi imkoniyatlarini ham kо‘p karra oshirdi. «Kompyuter shaxsning qudratini kengaytirgan sharoitda fuqarolar о‘z hukumatlarining harakatlarini hukumatlar fuqarolarning harakatlarini kuzatganidan samaraliroq kuzatishlari mumkin»¹³, deb qayd etadi amerikalik futurologlar D.Nesbit va P.Eburdin.
Darhaqiqat, inson faoliyati unga nisbatan tashqi uch omil – modda, energiya va axborotga asoslanadi. «Texnik taraqqiyotda uch asosiy unsur: bilim, energiya va material ishtirok etadi, - deb qayd etadi J. Tomson. – Kishilik jamiyati tabiat ustidan qay darajada hukmronlik qilishi mana shu uch unsurga bog‘liq. Ular orasida bilim asosiy unsur ekanligi shubhasiz; bilimsiz qolgan ikki unsur befoydadir»¹⁴. Texnik taraqqiyotda axborot shaklidagi bilimni uzatish va qabul qilish texnik vositalari doim muhim rol о‘ynaydi.
Jamiyat, uning madaniyati, texnik va ilmiy taraqqiyotning rivojlanishiga qarab axborot texnik vositalari ham о‘zgarib boradi. Odatda til, yozuv, matbaachilik va zamonaviy texnologiyalarning kashf etilishi bilan bog‘liq axborot inqiloblari qayd etiladi. Bunday inqiloblar sifat jihatidan har xil jamiyatlar paydo bо‘lishiga olib kelgan. Bu fikr ijtimoiy rivojlanishning boshqa sabablarini inkor etuvchi texnokratik determinizm hisoblanadi. Ammo axborotning yо‘qligi kishilik jamiyatining rivojlanishini ma’lum darajada cheklaydi. Shu bois D.S. Robertsonning quyidagi fikriga qо‘shilish mumkin: «Yangi sivilizatsiyaga о‘tilishiga olib kelgan har bir informatsion portlash odamlarning turmush tarzi, madaniyati va h.k.ni tubdan о‘zgartirgan. Yangi darajadagi sivilizatsiyaga о‘tishga olib keluvchi hozirgi informatsion portlash oldingi barcha portlashlardan kuchli va salmoqliroqdir»¹⁵.
Ijtimoiy taraqqiyotning dastlabki bosqichlarida odamlar axborot uzatish tabiiy vositalaridan foydalanganlar va keyinchalik ularni yaratganlar. Toshlar, chirmovuqlardan yasalgan tugunlar, gulxanlar, ovozlar va imo-ishoralar shular jumlasidan. Jamiyat rivojlanishining keyingi, sivilizatsion bosqichida axborot texnologiyasi sun’iy tashqi xotira – yozuvning paydo bо‘lishi bilan bog‘liq. Yozuv insonning biologik evolyusiyadan ijtimoiy evolyusiyaga о‘tishida katta rol о‘ynadi, uning borliqni bilish ijtimoiy xususiyati darajasini ancha oshirdi. Axborot texnikasining rivojlanishidagi keyingi bosqich axborot uzatish texnik vositalari (telefon, telegraf, radio)ning paydo bо‘lishi bilan bog‘liq. Ammo insonning aks ettiruvchi tizim sifatidagi psixofiziologik imkoniyatlari asta-sekin boshqariladigan jarayonlarning murakkabligi bilan tо‘qnashdi va bu mutlaqo yangi axborot vositasi – kompyuterlar paydo bо‘lishiga olib keldi.
Kompyuterlar paydo bо‘lishi bilan axborot vositalarining rivojlanishida yangi bosqich boshlandi. Inson texnik vositalar yordamida о‘z organizmining psixofiziologik cheklanganligini yengishga harakat qilib, axborot texnikasiga aqliy mehnat, axborotga ishlov berish va hatto ayrim mavhum fikrlash funksiyalarini yuklamoqda.
Zamonaviy axborot texnik vositalarining paydo bо‘lishi fan-texnika taraqqiyotining ilg‘or yutuqlari – elektron sanoat, aloqa texnik vositalari, audiovizual texnikaga asoslanadi. Informatika fan va ishlab chiqarishning yangi munosabatlarini о‘zida mujassamlashtirdi.
Kompyuterlar rivojlanishi hozirgacha besh avlodni о‘z ichiga oladi. 1937 yilda amerikalik fizik J. Atanasovda dissertatsiya ustida ishlash jarayonida hisoblash amallarini avtomatlashtirish g‘oyasi tug‘iladi va u о‘z aspiranti K. Berri bilan hamkorlikda kompyuter modelini yaratadi. Bu modelni ular 1942 yilgacha takomillashtiradilar. Ayni shu vaqtda bu yо‘nalishda AQShda A. Felirs va Rossiyada S.A. Lebedev ham ish olib bordi. Sal keyinroq elektron lampalarda ishlaydigan kompyuterlar – AQShda ENIAK va Angliyada KOLOS kompyuterlari yaratildi. 1946 yilda J. Fon Neyman kompyuterlar yasashga oid bir qancha yangi g‘oyalar taklif qildi¹⁶. Mana shu g‘oyalar negizida hozirgacha mavjud kompyuterlar arxitekturasi yaratildi.
1949 yilda Buyuk Britaniyada konstruktor M. Uilks J. Fon Neyman g‘oyalarini EDAK mashinasida texnik jihatdan gavdalantirib, saqlanadigan dasturli birinchi kompyuterni yaratdi. Sal keyinroq, 1951 yilda Rossiyada MEVM kompyuteri yaratildi. Saqlanadigan dasturli lampali kompyuterlarni seriyali ishlab chiqarishga о‘tilishi bilan birinchi avlod kompyuterlari davri boshlandi.
Lampali diodlarning yarim о‘tkazgichli diodlar bilan, lampali triodlarning tranzistorli triodlar bilan almashtirilishi, ferritli о‘zaklarda tezkor xotirani va magnitli disklarda uzoq muddatli xotiraning yaratilishi, algoritmik tillarning paydo bо‘lishi ikkinchi avlod kompyuterlariga xos. Uchinchi davrning boshlanishi integral sxemalardagi IBM-360 kompyuterlarining ishlab chiqilishi bilan bog‘liq. Keyinchalik mos keladigan periferiyali qurilmali kompyuterlar, kichik integral sxemalardagi mini-kompyuterlar yaratildi. Hozir katta integral sxemalardagi tо‘rtinchi avlod kompyuterlaridan foydalanilmoqda. Mikroprotsessorlar yaratilmoqda, ular mikrokompyuterlar yaratish imkonini bermoqda. Mikroprotsessorlarning yaratilishi axborot texnikasida shu qadar katta siljish sodir bо‘lishiga olib keldiki, hozirda mikroprotsessor inqilobi tо‘g‘risida kо‘p sо‘z yuritilmoqda. Shaxsiy kompyuterlar paydo bо‘ldi va ular yalpi kompyuterlashishga asos soldi.
80-yillar boshidan beshinchi avlod kompyuterlari ustida ish boshlandi. Bunday kompyuterlar о‘ta katta integral sxemalar va sifat jihatidan yangi arxitektura asosida quriladi: Fon Neyman strukturasi о‘zak shaklida saqlanadi, uning atrofida yangi bloklar joylashtiriladi. Mazkur bloklar, xususan, foydalanuvchi bilan kompyuter о‘rtasida tabiiy tilga yaqin tilda aloqa bog‘lanishini ta’minlaydi. Ma’lum fan sohasiga oid bilimlar bazasi strukturada muhim о‘rin egallaydi. Sun’iy intellekt g‘oyasi negizida ishlab chiqilgan modellar va vositalardan keng foydalaniladi. Ammo sun’iy intellekt tizimini ishlab chiqish beshinchi avlod kompyuterlari vazifasidir.
Beshinchi avlod kompyuterlari ustida ish 1978 yilda Yaponiyada, amalda esa – 1982 yildan boshlandi. Bu ish 10 yilga mо‘ljallangan edi. Tegishli loyiha ishlab chiqildi. Loyihaning maqsadi – kompyuter tizimlari yordamida keyingi о‘n yillikda yuzaga kelishi mumkin bо‘lgan jamiyatning muhim ehtiyojlarini qondirish, chunonchi, mehnat unumdorligini oshirish, xalqaro hamkorlikda Yaponiyaning yanada kengroq ishtirok etishini ta’minlash, energiya va foydali qazilmalarga bо‘lgan talabni qondirish, yoshlarning ma’lumot darajasini oshirish kabilardir. Loyiha mashinada tarjima qilish, inson-kompyuter dialogi, mantiqiy dasturlashtirish, mashinada loyihalash dasturlarini ham о‘z ichiga oldi. Inson uchun eng tabiiy interfeysni yaratish, mashina bilan tabiiy tilda aloqa qilishga erishish bosh vazifa qilib qо‘yildi.
1982 yilda ishlab chiqilgan loyihani amalga oshirish uchun Yaponiyaning 8ta firmasi Tokioda yangi avlod kompyuterlari institutini tashkil qildi. Ishga «fan samuraylari» – faol va ijodiy fikrlaydigan yosh olimlar jalb etildi. Ular hukumat organlari kо‘magida kompyuter va ekspert tizimlarini texnik va dasturiy ta’minlash vositalarini yaratish ustida ish boshladilar. Superjamg‘argichlar, ekspert tizimlari, bilim banklari va 16 megabaytli chip yaratildi. Biroq, mazkur dasturning kо‘pgina bandlarini amalga oshirishda olimlar katta qiyinchiliklarga duch keldilar va ular bajarilmay qoldi. Ammo loyiha ustida ishlash jarayonida intellektual kompyuter yaratish imkoniyati sinovdan о‘tkazildi. 1991 yilda Yaponiyada «Axborotga ishlov berish yangi texnologiyasi» yangi о‘n yillik dasturining turli jihatlari muhokama qilindi. Bu dastur oltinchi avlod kompyuterlari loyihasi deb baholandi.
Yaponiyada amalga oshirilgan yangi avlod kompyuterlari yaratish bо‘yicha milliy loyihalar boshqa mamlakatlarda ham shunday ishlar amalga oshirilishiga turtki berdi. Chunonchi, 1984 yilda AQShda 10 yilga mо‘ljallangan «Strategik kompyuter tashabbusi» dasturi qabul qilindi. 2001 yilgacha superkompyuter imkoniyatlariga ega bо‘lgan intellektual kompyuter yaratilishi haqida e’lon qilindi. Fransiyada 1983 yildan beshinchi avlod kompyuterlari yaratishning eng muhim yо‘nalishlari bо‘yicha olti loyiha ustida ish boshlandi. Shunga о‘xshash dasturlarni Germaniya va Yevropa Iqtisodiy Hamjamiyati ham ishlab chiqdi. 1985 yildan Rossiyada ham Fanlar akademiyalari hamkorligi doirasida 11 loyiha ustida ish boshlandi, lekin 1987 yilda ular tо‘xtatildi va kompyuter ishlab chiqarish hajmlari Rossiyada AQShdagi darajaning 1% gacha kamaydi. Hozirgi kunda kompyuter sanoatida, ilg‘or texnologiyalarning boshqa turlarida bо‘lgani singari, jahonda, ayniqsa, AQSH va Yaponiya о‘rtasida keskin raqobat ketmoqda.
Kompyuter texnikasining rivojlanish istiqbollari haqida har xil qarashlar mavjud. Ayrim mutaxassislarning fikricha, yaqin kelajakda kompyuterlar sifati va miqdorida aql bovar qilmas о‘sish sodir bо‘ladi. Boshqalarning taxminiga kо‘ra esa, kremniyli texnologiya о‘z ahamiyatini yо‘qotishi natijasida, buning batamom teskarisi bо‘ladi. Ammo hozirda yarim о‘tkazgichli boshqa materiallar ham sinovdan о‘tkazilmoqda, istiqbolda kompyuterlar konstruksiyasiga nisbatan «neyronli-tarmoqli» yondashuv, optik elementlar, molekulyar biologiya negizida kompyuterlar yaratish nazarda tutilmoqda. Har doimgidek, bir tabiiy tamoyilning eskirishi yangi tabiiy tamoyillar, materiallar, energiyaga о‘tilishiga olib keladi.
Dasturiy ta’minlash vositalari ishlab chiqish yirik tarmoqqa, dasturchi kasbi – ommaviy kasbga aylandi. Chunonchi, AQShda hozir dasturlashtirish sanoati yiliga 30% ga о‘smoqda. Jahon dasturiy mahsullar ishlab chiqarish sanoatining 70% ga yaqini AQShga tegishli ekanligi bejiz emas. Dasturiy xizmatlar kо‘rsatuvchi firmalarning umumiy miqdori AQShda 4000 dan, Buyuk Britaniyada – 3000 dan, Yaponiyada esa – 2500 dan oshib ketgan¹⁷.
Hozirgi zamon axborot texnologiyasi ilg‘or nomexanik texnologiyalar orasida muhim о‘rin egallaydi. U jamiyatning barcha sohalarida faoliyat kо‘rsatadi. Bu jarayon jamiyatni axborotlashtirishni industrial sanoat о‘rniga kelayotgan texnogen sivilizatsiyani rivojlantirish bosqichiga aylantiradi.
Sо‘nggi yillarda olimlarning umumiy soni ham kо‘paydi. Agar 1910 yilda dunyo bо‘yicha 15 ming nafar ilmiy xodim faoliyat kо‘rsatgan bо‘lsa, 1962 yilda ularning soni 2 mln.dan oshib ketdi. Olimlar sonining kо‘payishi bilan bir vaqtda ilmiy asarlar miqdorining о‘sishi ham qayd etilmoqda: 1665 yilda yer yuzida birinchi ilmiy jurnal paydo bо‘ldi, 1865 yilga kelib 1000 nomda ilmiy jurnallar nashr etila boshlandi, 1965 yilga kelib esa bunday jurnallar miqdori 100 mingdan oshib ketdi (ularda yiliga 5 mln.dan ortiq maqola e’lon qilinadi).
Informatsion portlash texnik taraqqiyot sur’atining tezlashishiga, kashfiyotlar miqdori keskin о‘sishiga turtki berdi. Sо‘nggi 10 yilda oldingi 2000 yildagiga qaraganda kо‘proq kashfiyotlar paydo bо‘ldi. Yangi mahsullarni ishlab chiqish va о‘zlashtirish davri izchil qisqarib bormoqda: bug‘ mashinasini о‘zlashtirish davri – 100 yil, parovozni о‘zlashtirish davri – 34 yil, dizelni о‘zlashtirish davri – 19 yil, reaktiv dvigatelni о‘zlashtirish davri – 14 yil, turboreaktiv dvigatelni о‘zlashtirish davri – 10 yil, avtomobil dvigatelini о‘zlashtirish davri – 7 yil, tranzistorlarni о‘zlashtirish davri – 5 yil, lazerni о‘zlashtirish davri esa – atigi 2 oyni tashkil qiladi. Bunda har bir yangi kashfiyot va kо‘payib borayotgan bilimlar hajmi bir yoki bir nechta yangi kashfiyotlarga turtki bermoqda.
Informatsion portlash axborot inqirozini keltirib chiqardi, ya’ni о‘sib borayotgan axborot hajmi bilan uni idrok etishning cheklangan imkoniyatlari о‘rtasida qarama-qarshilik yuzaga keldi. Tо‘g‘ri, informatsion portlash odamlarni ma’lum darajada shoshirib qо‘ydi. Ammo odamlar muammoni yuzaga keltirgach, qoida tariqasida, uning yechimini ham topadilar. Informatika yangi vositalarini ishlab chiqish fanning ilg‘or yutuqlaridan foydalanishga asoslanadi va, о‘z navbatida, ilmiy bilimning yangi sohalari shakllanishi va rivojlanishiga turtki beradi.
Insoniyat hamda inson faoliyati turli sohalarining globallashuvida Internet katta rol о‘ynaydi. Internet – jahon axborot tizimi yoki bir-biri bilan uzluksiz bog‘langan tarmoqlar birlashmasidir. Mazkur tarmoqqa ulangan har qanday kompyuter boshqa kompyuter bilan bir lahzada bog‘lanishi mumkin. Mazkur jahon axborot tizimi о‘ziga xos kibernetik muhitni, ideal borliqni, о‘z tushunchalari, qadriyatlari, fikrlash tarzi va tiliga ega kibernetik madaniyatni vujudga keltiradi. Internet tarmog‘iga ulangan kompyuterlar miqdori 1969 yilgi 4 kompyuterdan 1994 yilda 3,2 million kompyuterga yetdi. Hozirgi kunda Internet butun dunyoni qamrab olgan, jahonning 150 dan ortiq mamlakatida 15 millionga yaqin abonentga ega bо‘lgan global kompyuter tarmog‘idir. Tarmoq har oyda 7-10% ga о‘sib bormoqda. Bugun О‘zbekistonda internetdan fodalanuvchilar soni 700000 nafardan oshib ketdi. “UZ” milliy tarmoqida esa 3000 dan ortiq sayt rо‘yhatdan о‘tgan. 2004 yil yakunlariga kо‘ra axborot tizimlari va telekommunikatsiya sohasida kо‘rsatilgan xizmatlar miqdori 300 mlrd. sо‘mni tashkil qiladi¹⁸. Kompaniyalar bilan ularning hamkorlari yoki mijozlari о‘rtasidagi tashqi munosabatlarda ham, kompaniyalarning ichki tuzilishida ham jiddiy о‘zgarishlar sodir bо‘ldi. Tijorat faoliyatini olib borishning yangi yо‘nalishlari paydo bо‘libgina qolmasdan, mavjud yо‘nalishlar ham tubdan о‘zgardi. Bunday о‘zgarishlar har qanday davlatda vujudga kelgan «gibrid» faoliyat sohalari ustidan nazorat qiluvchi tegishli tuzilmalarni tashkil etishni taqozo etadi. Hozirgi paytda 28 yо‘nalish bо‘yicha dunyoning 180 mamlakatiga chiqadigan tо‘g‘ridan- tо‘g‘ri aloqa kanallari tashkil qilingan. Raqamli xalqaro telefon kanallari ulushi 84,7 foizni tashkil qiladi.¹⁹