5-Лаборатория машғулоти

Колориметрик усул

Эритмалар рН ини колориметрик усул ёрдамида аниқлаш индикаторларнинг маълум бир рН оралиғида, водород ионларининг фаоллигига қараб рангини ўзгартириш ҳоссасига асосланган. Бу усул билан индикаторлар ва стандарт буфер эритмалар ёрдамида муҳит шароити аниқланади.

Дастлаб универсал индикатор ёрдамида текширилувчи эритманинг таҳминий рН и аниқланади. Бунинг учун 2 мл текширилувчи эритма чинни идишда 5 томчи универсал индикатор билан аралаштирилиб, ҳосил бўлган ранг шкала билан солиштирилиб, рН нинг таҳминий қиймати топилади. рН и аниқланувчи эритманинг рН ига яқин бўлган ва бир-биридан 0,2 рН қийматга фарқланувчи 10 мл дан 5-6 та буфер эритма тайёрланиб, пробиркаларга солинади. Бошқа бир пробиркага эса 10 мл текширилувчи эритма солиниб, барча пробиркаларга 2-3 томчидан индикатор эритмаси томизиб, чайқатилади ва пробиркалардаги эритмалар рангининг интенсивлиги солиштирилади.
Индикаторни танлашда, унинг ранг ўзгартириш оралиғи маркази, аниқланувчи рН га яқин бўлишига аҳамият бериш лозим. Индикатор эритмалари стандарт ва текширилувчи эритмаларга тенг миқдорда қўшилади.

Потенциометрик усул

рН ни аниқлашнинг потенциометрик усули икки электроддан иборат елементнинг електр юритиш кучини ўлчашга асосланган. Электродлардан бири потенциали аниқланувчи муҳит водород ионлари фаоллигига боғлиқ бўлган индикатор электрод, иккинчиси эса потенциали аниқ катталикдан иборат бўлган стандарт электрод бўлиб, у солиштирилувчи электрод дейилади. Солиштирилувчи электрод сифатида каломел ва кумуш хлорид электродларидан фойдаланилади.
Индикатор электрод сифатида эса водород, хингидрон ва шиша электродлардан фойдаланилади. рН ни аниқлаш учун тузилиши турлича бўлган рН-метрлар қўлланилиб, уларда тўғридан-тўғри аниқланаётган рН қийматини ўлчаш мумкин. рН-метрни ва электродлар тизимини ишлаш учун тайёрлаш ускунадан фойдаланиш кўрсатмасига асосан амалга оширилади.
Ускунани созлаш учун стандарт буфер эритмалардан фойдаланилиб, бунда муҳит шароити аниқланувчи рНга яқин бўлган буфер эритмани олиш тавсия этилади.
Қайси буфер эритма олинганлигидан қатъий назар потенциометрик усул билан аниқланган рН ҳатолиги 0,04 дан ошмаслиги лозим. Текширилувчи эритмаларнинг рН и аниқланганда, ускунанинг кўрсаткичи турғун ҳолатга келгунига қадар кўтарилиб, бу вақт эритманинг буфер ҳоссаларига ва ҳароратга боғлиқ бўлган ҳолда 2 минутдан кўп бўлмайди.
Кучли кислота ва кучли ишқор эритмаларининг рН и 0⁰Сга яқин бўлган ҳароратда аниқланганда ёки буфер ҳажми кам бўлган эритмаларнинг рН и аниқланганда (масалан, тозаланган сув) аниқлаш вақти 2 минутдан кўп бўлиши ҳам мумкин.,
Одатда эритманинг рН и 3-5 марта ўлчаниб, аниқланган кўрсаткичлапнинг ўртача қиймати олинади.

Расм 7. Шиша электродли потенциометрнинг тузилиш чизмаси
1 - стандарт электрод, 2 - рНи аниқланувчи эритма, 3 - шиша электрод, 4 - рН-қийматини ўлчашга мосланган юқори омли потенциометр, 5 - кумуш хлорид суркалган кумуш пластинка, 6 - шиша мембрана.