4-mavzu: Farmatsevtik ishlab chiqarishda ishlatiladigan yordamchi moddalar. Maqsad

Gidrogenlangan moylar – yumshoq asoslar bo’lib, ular asosan yumshoq surtmasimon maxsulotlarni tayyorlashda keng qo’llaniladi. Ular: salomas yoki gidromoylar – Adeps hydrogenisatum, o’simliklardan olingan salo – Axungia vegetabilis [88-90% gidromoy va 1012% o’simlik moyning qotishmasi], aralashgan moy (kombijir) – Adeps compositus [55% salomas, 30% o’simlik moyi va 15% mol, cho’chqa yoki gidrogenlangan kit yog’i].

O’simlik moylari. Kungaboqar moyi (Oleum Helianthi), o’rik moyi (Oleum Persicorum) va boshqa bir qator o’simlik moylari asosan mol yog’i va mumlar bilan birgalikda ishlatiladi. Natijada bir qator xossalari bilan cho’chqa moyiga yaqin bo’lgan qotishmalar hosil bo’ladi. Bu moylarda kislota soni 2,25-2,5 dan ortmasligi kerak.

Moylarning asosiy kamchiligi bu havoda ayniqsa suv ishtirokida tez buzilishi bo’lib, farmakologik indifferentlik ularning yangiligiga bog’liq. Moylardan og’ir metall oksidlari va tuzlari shuningdek, perekislar va ozonidlardan iborat bo’lgan surtmalarni tayyorlashda asos sifatida foydalanish mumkin emas. Sababi ular moylarning strukturasini o’zgartirib, asos sifatidagi xossalariga putur etkazadi. Bu maqsadda bir qator tabiiy va sintetik antioksidantlar sintez qilingan bo’lib, ularning ba‘zilari tabiiy holda masalan o’simliklarda ham uchrashi mumkin. (tokoferollar). Sintetik antioksidantlardan yuqori faollikka ega bo’lgan va fiziologik nuqtai nazaridan bezarari bu butiloksianizol (BOA) va butiloksitoluoldir (BOT). Ularning har ikkisi ham moylarning turg’unligini oshirishda 0,02% gacha ishlatishga ruhsat etilgan. O’simlik va hayvon moylari ularning tarkibidagi tabiiy tokoferollarning miqdoriga qarab belgilanadi. Moylardagi oksidlanish jarayoni ularning tarkibidagi yodning miqdoriga bog’liq bo’lib, yod asosan vodorod peroksidini parchalash uchun sarflanadi. YAngi cho’chqa va mol yog’ida perekis soni 0,03 dan ortmasligi kerak.

Mumlar. Ular o’z tarkibida yog’ kislotalari va yuqori molekulyar masali, bir atomli spirtlarning murakkab efirlarini saqlaydi. Surtma asosi sifatida mumlardan lanolin, spermatset va asalari mumi ishlatiladi.

Lanolin (Lanolinum) – efir, spirt va erkin yog’ kislotalarining murakkab, tabiiy birikmasi bo’lib, u sovunlanganida teng miqdordagi kislota va spirtni xosil qiladi. Lanolinning sovunlanmaydigan qismi 50% ni tashkil qiladi. Uning tarkibidagi moddalarning umumiy miqdori 70% dan ortadi.

Tozalangan lanolin – qo’ng’ir sariq rangli, qovushqoq, o’ziga xos hidli massa. Suyuqlanish harorati 36-42⁰S, suvda erimaydi, lekin 150% miqdoridagi suv bilan emulgirlash mumkin. SHuning uchun ayniqsa surtmalar texnologiyasida suvsiz lanolin (Lanolinum anhydricum) dan foydalanish maqsadga muvofiqdir. Bunday lanolin bilan tarkibida ko’p miqdorda suvli eritmalar saqlovchi surtmalarni ham tayyorlash mumkin. Suvsiz lanolin tarkibidagi suvning miqdori 1% dan, kislota soni 1 dan ortmasligi lozim. Lanolin spirtda qiyin eriydi, 100 qism suvsiz lanolin, 40 qism 70% spirt bilan dag’al dispers sistema xosil qiladi. Glitserin bilan suvsiz lanolin yaxshi kelishadi (100 qism suvsiz lanolinga 120-140 qism glitserin). Efir va xloroformda yaxshi eriydi. Teri orqali yaxshi so’riladi, u o’z tarkibi bilan odam terisidagi moysimon moddalarga yaqin. Teri va shilliq qavatlarni odatda qitiqlamaydi, kimyoviy jihatdan ancha turg’un, garchand uning yuzasida oksidlanish jarayoni sodir bo’lishi bilan rangining o’zgarishi kuzatilsa ham. U yuqori qovushqoqlikka va yopishqoqlikka ega bo’lganligi uchun ham ko’proq boshqa asoslar bilan birgalikda ishlatiladi. Suvli lanolin Lanolinum hydricum – 7 qism suvsiz lanolin va 3 qism suvdan iborat. Suvli lanolin tarkibidagi suvning miqdori 32% ni tashkil qiladi. Uni qizdirish bilan emulsiyani parchalash mumkin.