3-mavzu Psixologiya tarmoqlari va psixolog kasbiy faoliyati

3.6. Ijtimoiy munosabatlar sohasida psixolog faoliyati xususiyatlari.
Hozirgi kunda ijtimoiy munosabatlar kang ma’noda oila bilan bog‘liq psixologik muammolarni chetlab o‘ta olmaydi. Chunki, oila sir-sinoatlarga to‘liq ijtimoiy makondir. Uning farovon, fayzli va barokatli bo‘lishini istamagan insonning o‘zi yo‘q. Fozil inson va uning jamiyati paydo bo‘libdiki, oila deb atalmish muqaddas dargohga asos solingan. Yaratganning o‘zi uni nurga, ilmga, sir- sinoatga to‘ldirgan, erkak va ayolning dastlabki muqaddas nikohini o‘qigan, farishtalar esa bu buyuk uyushmaga guvoh bo‘lgan.
Oila ilmi, aniqrog‘i, nikohga kirib, oila qurib, fazilatli, yurtparvar, aqlli va solih farzandlar o‘stirib, kamolga yetkazish ilmi, XXI asr odami uchun naqadar zarur va egallanishi mushkul bu ilm barcha boshqa ilmlar kabi igna bilan quduq qazigan kabi qiyin, bilganing sari bilishga ishtiyoqni orttiradigan ilmlardan. Kelinlik yoki kuyovlik, onalik yoki otalik, buva yoki momo bo‘lish ilmi – sharqona qadriyatlarimiz asrlar mobaynida e’zozlab, ardoqlab kelayotgan ilmlar majmuidir.
Oila ilmini egallash zarur. Chunki oila va nikoh zamiridagi barcha ezgu niyatlar har bir fuqaroning qalb turidagi ezgu niyatlarigina bo‘lib qolmay, shu yurt, shu muqaddas tuproqni asrash, uni gullab-yashnashiga bevosita aloqador. Demak, Vatan istiqboli, mahalla obodligi, xonadonlar farovonligi bir-biriga bog‘liq, uyg‘un va mushtarak tushunchalardir. Bu maqsadlar oddiy istaklar, orzu-havas bilangina amalga oshib qoladi. Ular zaxmatni, izlanishni, o‘rganishni, fikran mushohada qilish, eng avvalo, odamiylik, go‘zal xulq va fe’l-atvorni nazarda tutadi. Mashaqqatsiz, zahmatsiz rohat bo‘lmaganidek, oila ilmini egallamay turib, uning muqaddas ostonasini bosib bo‘lmaydi, inson zotining baxti to‘kis bo‘lmaydi. Sog‘lom va oqila ona, tadbirkor va ibratli ota bo‘lish, to‘rt muchasi sog‘, aqli zukko farzandni tarbiyalash, unga hayotning barcha saboqlarini berish, yomonliklardan, turli baloyu qazolardan, xavf-xatardan, yot mafkuralardan asrashning o‘zi bo‘lmaydi.