3-mavzu. Hisob-kitob, valyuta va maxsus schyotlardagi pul mablag’larini hisobga olish

3-MAVZU. HISOB-KITOB, VALYUTA VA MAXSUS SCHYOTLARDAGI PUL MABLAG’LARINI HISOBGA OLISH

REJA

3.1. Bankdagi hisob-kitob schyotiga doir muomalalar hisobi.
3.2. Bankdagi maxsus schyotlar va boshqa pul mablag‘lariga doir schyotlar bo‘yicha muomalalar hisobi..
TAYANCH IBORALAR
Hisob-kitob schyoti, ustav kapitali, valyuta schyoti, kurs farqi, devalvatsiya, qo’shilgan kapital, xususiy kapital, vakillik banklari, debitor, valyuta kursi, talab va taklif, tovarlarning naflilik, raqobat shakllari, inflyatsiya darajasi.


3.1. Bankdagi hisob-kitob schyotiga doir muomalalar hisobi.
Korxonalar pul mablag‘larini saqlash va turli hisob-kitoblarga oid muomalalarni amalga oshirishlari uchun bankda hisob-kitob schyoti ochadilar. Buning uchun bankka xo‘jalik yurituvchi sub’ekt rahbari va bosh buxgalterining yuqori tashkilot tomonidan tasdiqlangan 2 nusxada arizasi, imzolar namunasi, muhr izi tushirilgan kartochka, korxonaning notarial idora tomonidan tasdiqlangan nizomidan 1 nusxa va yuqori tashkilotning korxonani tashkil etish to‘g‘risidagi buyrugidan ko‘chirma taqdim etiladi.
Hisob-kitob schyotiga sotilgan mahsulot va bajarilgan ishlar uchun tayyorlov tashkilotlari va boshqa xaridorlardan kelib tushgan pul; kassadan topshirilgan naqd pullar; debetor qarzlarning to‘lanishi; tabiiy ofat natijasida ko‘rilgan zararlarni qoplash uchun o‘tkazilgan sug‘urta to‘lovlari; ishlab chiqarish ehtiyojlari uchun bank tomonidan berilgan ssudalar hamda korxonaning hisob-kitob schyotida saqlanayotgan puli uchun bank tomonidan berilgan foizlar kelib tushadi.
Hisob-kitob schyotidan quyidagi to‘lovlar amalga oshiriladi: sotib olingan tovar-moddiy boyliklar va ko‘rsatilgan xizmatlar uchun to‘lovlar, mehnat haqi to‘lash va xo‘jalikning turli ehtiyojlari uchun naqd pullarni kassaga berish, davlat byudjeti oldidagi majburiyatlarni to‘lash, bank ssudalari bo‘yicha qarzlarni to‘lash, akkreditivlar qo‘yish va xo‘jalik faoliyati bilan bog‘liq bo‘lgan boshqa to‘lovlar. Bank hisob-kitob schyotidan to‘lovlar o‘tkazishni to‘lov hujjatlarining kelib tushishiga qarab amalga oshiradi. Agar kelib tushadigan hujjatlarning hammasini to‘lashga yetarli mablag‘ bo‘lmasa, u holda to‘lovlar qathiy navbat asosida amalga oshiriladi.