3-боб. Оптик алоқа тизимларида қЎлланиладиган ёруғлик манбалари

3-боб. ОПТИК АЛОҚА ТИЗИМЛАРИДА
ҚЎЛЛАНИЛАДИГАН ЁРУҒЛИК МАНБАЛАРИ


3.1 Оптик алоқа тизимларида қўлланиладиган ёруғлик
манбаларига қўйиладиган талаблар ва уларнинг турлари


Tолали оптик алоқа тизимларида электр сигналини ёруғлик сигналига ўзгартириш узатувчи оптоэлектрон модули томонидан амалга оширилади.
Ёруғлик манбаи узатувчи оптоэлектрон модулнинг асосий элементи ҳисобланади, айнан шу элемент ёрдамида бу модул киришидаги электр сигналлари унинг чиқишида ёруғлик сигналларига ўзгартириб берилади.
Толали оптик алоқа тизимларида қўлланиладиган ёруғлик манбаларига қуйидаги талаблар қўйилади:
- ёруғлик манбаи оптик кабелнинг кўндаланг кесимига мувофиқ ўлчам-ларга эга бўлиши керак;
- сигнални узоқ масофага узатиш учун ёруғлик манбаи етарли даражада катта қувватга эга бўлиши керак;
-нурланиш қувватининг ёруғлик манбаидан чиқишидаги йўқотишларни имкон қадар камайтириш учун ёруғлик манбаи оптик зичлиги бўйича оптик тола билан мувофиқлашган бўлиши, бошқача қилиб айтганда, унинг синдириш кўрсаткичи оптик толанинг синдириш кўрсаткичига яқин бўлиши керак;
- ёруғлик манбаининг нурланиши оптик толанинг шаффофлик «дарча» ла-ридан бирига мос келиши керак. Ҳозирги кунда қўлланишда бўлган оптик толаларда ёруғликнинг тарқалиш жараёнида ютилиши ва бошқа турдаги йўқотишлар жуда кам содир бўладиган учта ана шундай «дарча» мавжуд. Уларнинг марказлари қуйидаги тўлқин узунликларига мос келади: λ=850 нм; λ=1300 нм; λ=1550 нм;
-ахборотларни талаб этилган тезликларда узатишни таъминлаш учун ёруғлик манбаи етарли даражада катта модуляция частоталарида ишлай олиши керак;
- ҳароратнинг ўзгаришлари ёруғлик манбаи ишига имкон қадар кам таъсир қилиши керак;
- ёруғлик манбаининг таннархи нисбатан арзон бўлиши керак;
- ёруғлик манбаининг хизмат муддати етарли даражада катта бўлиши керак.
Бугунги кунда толали оптик узатиш тизимларида бу талаблар мажмуига жавоб берадиган ёруғлик манбаларининг икки туридан – ярим ўтказгичли ёруғлик диодлари ва инжекцион лазер диодларидан фойдаланилади. Қуйида уларнинг иш механизми, характеристикалари ва параметрларини батафсил кўриб чиқамиз.