3 бўлим: Шўр ерларда доривор ўсимликларнинг интродукцияси ва биологик хусусиятлари

- Итбурун наматак - Шиповник собачий (Rosa сanina L.).
Итбурун наматак - Rosaceae оиласига мансуб, кўп йиллик баландлиги 2 м га етадиган бута. Наматак (Cinnamomeae DC) туркумига 28 тур киради ва таркибида С витамини сақлаши билан 8 бўлимга (секция) бўлинган. Наматак вакиллари асосан Европанинг шимолидаги ўрмонлар атрофларида, ботқоқликлар бўйларида, тоғ олди адирликларнинг нам жойларида кўп тарқалган бўлиб, уларнинг ареали шарққа томон Урал, Сибир, Кавказ ва Шарқий Осиёгача чўзилади [29] (илова – 300-бет).
Итбурун наматакнинг мевалари таркибида жуда кўп миқдорда С вита-мини (аскорбин кислотаси) ва А провитамини (каротин) мавжуд. С витамини организмдаги турли хил касалликларда витамин етишмаслигининг олдини олишда, шамоллашда, ошқозон-ичак касалликларини даволашда ишлатилади [20].
Шўр тупроқларда итбурун наматак (юқори витаминли шакли) кўчатдан интродукция қилинди. Кўчатларнинг кўкарувчанлиги -88,9% ва сақланиши -100% гача ни ташкил этди. Кўчатлар экилганда асосий пояларнинг бўйи ўртача 40-45 см ни ташкил этиб, 1-вегетация давомида ўртача 25-30 см га ўсади. Бир туп ўсимликда ўртача 6-7 та янги поялар ҳосил бўлади. Асосий пояларда 32,4±5,71 та барглар ҳосил бўлиб, уларнинг пастки қисмидаги ёғочланиш 17,6±2,13 см ни ташкил этади. 1-вегетация давомида асосий поялардан ўртача 7,2±2,59 та барглар тўкилади. 2-вегетация йилида, ҳосил бўлган янги пояларнинг 100% кўкарувчанлиги кузатилади. Бир туп ўсимликда асосий пояларнинг сони ўртача 17 - 21 та га кўпаяди. Вегетация давомида, уларнинг баландлиги ўртача -93,6±5,92 см га ўсиб, 38,6±3,31 та барглар қайд этилди. Асосий пояларнинг ёғочланиши 55,2±6,47 см ва улардан тўкилган барглар ўртача 18,6±2,11 та ни ташкил этади. Вегетациянинг 2 –йили май ойида асосий пояларда кўп сонли (ўртача 21,7±2,73 та) 1-тартибли новдалар ҳосил бўлади ва сентябр ойида уларнинг узунлиги -32,4±4,39 см га етади (3.8 - жадвал).
Шундай қилиб, ўртача шўрланган тупроқларда итбурун наматак кўчатларининг кўкарувчанлиги ва сақланувчанлиги юқори кўрсаткичга эга. Ўсимликларни ташқи кўриниши ва ўсиш жадаллигига асосланиб, шўрланишга чидамли ва тез мослашувчи интродуцентлар қаторига киритилди.