2-seminar mashg’uloti Yong‘in xavfsizligini ta’minlashning huquqiy asoslari

2-seminar mashg’uloti

Yong‘in xavfsizligini ta’minlashning huquqiy asoslari

O‘zbekiston Respublikasida yong‘in xavfsizligini ta’minlash masalasiga dolzarb vazifa sifatida qaralib, bu borada mustaqillik yillarida qator islohotlar amalga oshirildi. Ayniqsa mamlakatimizda ushbu sohaning huquqiy bazasini zamon talabi asosida tashkil etish, huquqiy me’yoriy hujjatlar ishlab chiqish va amalda uning huquqiy asoslarini ta’minlash eng muhim ustuvor vazifalardan biri hisoblanadi. Dunyo tajribasi shuni ko‘rsatadiki yong‘in xavfsizligini huquqiy jihatdan ta’minlagan davlatgina bu soha faoliyatida ma’lum yutuqlarga erishishi mumkin.

O‘zbekiston Respublikasining yong‘in xavfsizligi sohasidagi qonunchilik hujjatlari O‘zbekiston Respublikasining Konstitutsiyasiga asoslangan bo‘lib, “Yong‘in xavfsizligi to‘g‘risidagi” Qonun hamda unga muvofiq qabul qilinadigan qonunosti va boshqa normativ-huquqiy hujjatlardan iborat.

O‘zbekiston Respublikasining “Yong‘in xavfsizligi to‘g‘risida”gi Qonuniga muvofiq “yong‘in xavfsizligi” - bu odamlarning, yuridik va jismoniy shaxslar mol-mulkining, shuningdek atrof tabiiy muhitning yong‘inlardan himoyalanganligi holati bo‘lib, bunga korxona (tashkilot)da yong‘in xavfsizligini tizimli ta’minlash orqali erishiladi.

Yong‘in xavfsizligini ta’minlash uchun asos sifatida yong‘in modelining elementlari orasidagi o‘zaro aloqa va uzviy bog‘liqlikni olish kerak. Korxona (tashkilot)dagi muayyan sharoitlardan kelib chiqib, normativ hujjatlar talablariga amal qilgan holda yong‘in modelining turli elementlariga ta’sir etish orqali yong‘in xavfsizligini ta’minlashga erishish mumkin. Ayrim sharoitlarda yong‘in modelining u yoki bu elementiga ta’sir etish orqali uni o‘zgartirish mumkin. Misol uchun, qurilgan binoning yong‘inga qarshi himoyasini unda rekonstruksiya ishlarini olib bormay o‘zgartirishning iloji yo‘q, xuddi shunday neftni qayta ishlash korxonasida yonuvchi muhitni hamda metallurgiya korxonasida esa yondirish manbaini to‘liq yo‘q qilish mumkin emas.

Korxonalar uchun yong‘in xavfsizligi talablari turli normativ hujjatlarda, ya’ni Prezidentning farmon va qarorlari, qonunlar, hukumat qarorlari, mahalliy davlat hokimiyati organlarining qaror va farmoyishlari, standartlar, normalar, qoidalar va yo‘riqnomalar kabi hujjatlarda belgilangan bo‘lib, ularni bir qancha guruhlarga ajratsa bo‘ladi.