2-маъруза ахборот тизимининг классификацияси

2-МАЪРУЗА
Ахборот тизимининг классификацияси

Режа:
1. Ахборот тизими тушунчаси
2. Ахборот тизимининг классификацияси
3. Жорий этиш соҳаси бўйича классификация


1. Ахборот тизими тушунчаси

Кўплаб соҳаларда ва тизимли таҳлилда “ахборот тизими” тушунчаси катта аҳамиятга эга. Ахборот тизими интеллектуал (ақлий) ишларни автоматлаштиришда, хусусан ахборотларни қидириш, администрация-лаш, экспертиза қилиш, қарорлар қабул қилиш, бошқарув, билимларни йиғиш, ўқитиш каби инсон фаолияти соҳалари билан боғлиқдир.

Ахборот тизими-ахборот жараёнларини амалга оширувчи ва уни қўллаб –қувватловчи ҳар қандай тизимдир.
Ахборот тизими-бу шундай тизимки, унинг элементлари, мақсади, ресурслари, структураси асосан ахборот даражасида кўрилади.
Ахборот тизими-ахборотларни йиғиш, сақлаш, қайта ишлаш, узатиш ва қабул қилиш процедураларини амалга оширувчи мажмуадир.
Ахборот тизими-ахборотларни ташкил этиш, сақлаш, тўлдириш, қайта ишлаш, қўллаб-қувватлаш ва фойдаланувчига унинг сўрови асосида тақдим этишни амалга оширувчи автоматлаштирилган тизимдир.
Ҳисоблаш техникасининг пайдо бўлишидан сўнг ахборот тизимлари автоматлаштирилганг ахборот тизимларига айланди. Автоматлаштирилган ахборот тизимларининг физик ва функционал компоненталарини дастурий-техник комплекслар ва алоқа воситалари ташкил этади.
Ахборот тизими – бу қўйилган мақсадга эришиш йўлида фойдаланиш учун ахборотларни йиғиш, ишлов бериш, сақлаш ва узатиш учун қўлланиладиган воситалар ва усулларнинг ўзаро мутаносиблигидир. Ахборот тизимининг замонавий тушунчаси – шахсий компьютерни ахборотга ишлов беришнинг асосий воситаси сифатида қўллашдир. Катта ташкилотларда шахсий компьютерлар билан бир қаторда ахборот тизими техник базасига мейнфрейм ёки супер ЭҲМ кириши мумкин. Бундан ташқари, ишлаб чиқариладиган ахборотда инсоннинг ўрни ҳисобга олинмаса (инсонсиз ахборотни олиш ва тақдим этиш мумкин эмас), ахборот тизимининг техник жиҳозланиши ҳеч қандай қийматга эга эмас. Компьютерлар ва ахборот тизимлари ўртасидаги фарқни тушуниш зарур. Махсус дастурий воситалар билан жиҳозланган компьютерлар ахборот тизимлари учун техник негиз ва анжом ҳисобланади. Ахборот тизими компьютерлар ва телекоммуникациялар билан ўзаро мулоқотда бўлувчи ходимларсиз маънога эга эмас.