Odatiy ong hayotiy tajriba asosida vujudga kelgan oddiy xulosalar, qarashlar majmuidan iborat bo‘lib, kishilarning kundalik hayotidagi voqealarni aks ettiradi va rivojlanadi. Uning sohiblari – sub‘ektlari alohida olingan shaxslarning hayotiy tajribasi, qiziqishlari, qobiliyatlari, bilimlari, hayotda egallangan mavqelari hech qachon bir xil bo‘lmaydi. Odatiy ongda nazariy bilimlarga dalil va asos bo‘lib xizmat qiladigan elementlar bo‘ladi. Olimlar, san‘atkorlar turli nazariyalar, badiiy obrazlar yaratishda hayotiy-kundalik ongga asoslanadilar, undan ma‘naviy oziq oladilar. Odatiy ongda xalq donishmandligi, an‘ana va urf-odatlar, kundalik turmush qoida va talablari, tabiat haqidagi bilimlar, shuningdek turli uydirmalar, noto‘g‘ri qarashlar ham o‘z ifodasini topadi. Ko‘p asrlik hayotiy tajribani ixcham shaklda o‘zida mujassamlashtirgan xalq maqollari bunga misol bo‘la oladi. Odatiy ong sof holda uchramaydi. Chunki, inson farzandi murg‘aklik davridanoq o‘z atrofidagilar, so‘ngra kitoblar, ta‘lim tizimi yordamida inson zakovati erishgan ilmiy bilimlarni ham o‘zlashtirishga kirishadi. Boshqacha aytganda, sodir bo‘layotgan voqealarga nafaqat o‘z tajribasi, balki ilmiy bilimlar nuqtai nazaridan ham baho bera boshlaydi, nazariy ong ta‘sirida bo‘ladi.
Nazariy ong deganda nazariyotchilar, olimlar ishlab chiqqan nazariy qarashlar va ilmiy bilimlar tizimi tushuniladi. Odatiy ongdan farqli o‘laroq nazariy ong o‘zgaruvchan xarakterga ega. Bu o‘zgaruvchanlik ilmiy bilimlarning shiddatli rivojlanishi, voqelik haqidagi bilimlarning doimiy chuqurlashib va kengayib borishi bilan belgilanadi. Shuningdek, odatiy ongga voqealarning tashqi tomonini ifodalash xos bo‘lsa, nazariy ong voqealarning mohiyatini, rivojlanish qonuniyatlarini aks ettiradi. Shuning uchun ham u odatiy ongga faol ta‘sir qila oladi va kundalik tajriba asosida hosil qilingan bilimlarni saralashga yordam beradi.
Falsafada metod va metodologiya muammosi nihoyatda katta ahamiyat kasb etadi. Fan tarixida nom qoldirgan olim va faylasuflarning ilmiy merosini ko`p jihatdan ularnng qaysi uslubga tayanganiga qarab baholash ham mumkin. Metod (yunoncha metods- usul) keng ma'noda bilishga erishish yo`li, ijodiy faoliyatning har qanday shakli, usuli kabi ma'nolarni anglatadi. Metod bilish usuli sifatida o`rganilayotgan ob'ektning jihatlari va xossalarini laboratoriyada, ilmiy tadqiqot moslamasida, sinov stendida, shuningdek, tadqiqotchining miyasida aks ettirish usulidir.
Do'stlaringiz bilan baham: |