15-mavzu. Korxonaning hisob siyosati (4 soat)

Talab qilinadi:
1. Buxgalterga hisob siyosatining mohiyati, uni tuzishning zarurligi va normativ-huquqiy asoslarini tushuntiring.
2. Hisob siyosatini shakllantirish bosqichlarini tushuntiring.
3. Korxona hisob siyosatining tarkibi, tuzish va rasmiylashtirish tartibini tushuntirib bering.

2. “Bekzod. Ya.Z” xususiy korxonasi 20... yil 12 aprelda davlat ro‘yxatidan o‘tgan holda yuridik shaxs maqomiga ega korxona sifatida faoliyatini boshlagan. Xususiy korxonaning faoliyati dastlabki 3 oyda yaxshi bo‘lmaganligi bois korxona rahbarining o‘zi mustaqil buxgalteriyasini yuritib kelgan. Hisobot davrining III choragida korxonaning faoliyati yaxshilanib, ishlab chiqarayotgan mahsulotlari xaridorlar tomonidan xarid qilish hajmi oshib borgan. Shu bois, korxona rahbari buxgalteriya hisobi va hisobotini yuritish uchun buxgalter lavozimini joriy qilgan holda korxonaga A.Sobirovni buxgalter sifatida ishga qabul qildi va unga korxonaning hisob siyosatini ishlab chiqish topshirig‘ini berdi.

A.Sobirov tomonidan korxonaning hisob siyosati oktyabr oyida ishlab chiqildi va tegishli tartibda rasmiylashtirildi.
20... yil noyabr oyida korxonaga bir yangi mulkdor qo‘shildi. U A.Sobirovdan korxonaning hisob siyosati bilan tanishib chiqish maqsadida taqdim qilishni so‘radi. Yangi mulkdor korxonaning hisob siyosatini tanishib bo‘lgandan so‘ng, A.Sobirovga nega korxonaning hisob siyosati davlat ro‘yxatidan o‘tgandan keyin 90 kun ichida ishlab chiqilib rasmiylashtirilmaganligini sababini so‘rab murojaat qildi. Axir amaldagi normativ-huquqiy hujjatlarda shunday tartib belgilanganligini tushuntirdi. Bunga javoban A.Sobirov amaldagi qonunchilikda yangi tashkil etilgan korxonaning hisob siyosati uning moliyaviy hisobotini birinchi marta e’lon qilgunga qadar rasmiylashtirishi kerakligi belgilanganligini aytib o‘tdi.
Talab qilinadi:
1. Mazkur holatda A.Sobirov to‘g‘ri yo‘l tutganmi? Fikringizni asoslab bering.
2. Yangi mulkdorning e’tirozi o‘rinli deb o‘ylaysizmi?
3. Amaldagi normativ-huquqiy hujjatlarga muvofiq yangi tashkil etilgan korxonalarda hisob siyosati qaysi vaqtda ishlab chiqilib rasmiylashtirilishi lozim.
4. O‘zi xo‘jalik yurituvchi sub’ektlar tomonidan hisob siyosati ishlab chiqilishi kerakmi? Fikringizni asoslab bering.