13-mavzu. Meda kasalliklarining ratsional farmakoterapiyasi Reja

13-mavzu. Meda kasalliklarining ratsional farmakoterapiyasi
Reja:

1. 
   Gastrit kasalligining ratsional farmakoterapiyasi
   
2. 
   Meda yarasi kasalligining ratsional farmakoterapiyasi
   

Tayanch tushunchalar: Meda kasalliklari etiopatogenezi, kechishi, asoratlari va davolash prinsiplari.
Adabiyotlar
1. Aliyev X.U, Allayeva M.J. “Klinik farmatsiya”. Darslik. Toshkent, 2011 yil.
2. Salimov Yu. “Veterinariya farmakologiyasi”. O‘quv qo‘llanma. Samarqand, 2019 yil.
3. Соколов В.Д. “Фармакология”. Учебник. Санкт-Петербург, 2010 год.

Meda kasalliklari etiopatogenezi, kechishi, asoratlari va davolash prinsiplari. Meda kasalliklarini davolashda qo`llaniladigan preparatlarni farmakokinetikasi

Gastrit (Gastiritis) - oshqozon shilliq pardasi va uning devorining yallig‘lanishi bo‘lib, a’zoning sekretor-fermentativ, evakuator, ekskretor va inkretor funksiyasining buzilishi bilan tavsiflanadi. Kelib chiqishiga ko‘ra, birlamchi va ikkilamchi; kechishiga ko‘ra, o‘tkir va surunkali; jarohatlanishning xarakteriga ko‘ra, ekssudativ va alterativ; yallig‘lanishning turiga ko‘ra, zardobli, kataral, gemorragik, fibrinli va yiringli; yallig‘lanishning joylashishi va tarqalishiga ko‘ra, yuzaki va chuqur, o‘choqli va diffuz gastritlar farqlanadi. Alterativ yallig‘lanish erroziyali va yarali bo‘lishi mumkin. Funksional belgilariga ko‘ra, sekretsiyaning me’yorda bo‘lishi (normatsid), me’yordan yuqori bo‘lishi (giperatsid) va me’yordan past bo‘lishi (subatsid, axiliya) bilan o‘tadigan gastritlar; morfologik belgilariga ko‘ra, atrofik va gipertrofik gastritlar farqlanadi.
Kasallik cho‘chqalar, otlar va go‘shtxur hayvonlar orasida keng tarqalgan bo‘lib, ko‘pincha yosh hayvonlar kasallanadi. Sanoat tipidagi cho‘chqachilik komplekslarida quruq omixta emlar bilan barvaqt oziqlantirishda onasidan 26-30 kunligida ajratilgan cho‘chqa bolalarining yoppasiga kasallanishi kuzatilishi mumkin. Bu paytda ko‘pincha eroziyali-yarali gastrit qayd etiladi.