13-боб қАЛҚонсимон без гормонлари

13.2. Қалқонсимон безнинг гиперфункцияси
Диффуз токсик бўқоқ (Грейвс касаллиги, Базедов касаллиги) — қалқонсимон без гиперфункциясининг энг кенг тарқалган шаклидир. Бу касалликда қалқонсимон без катталашади, бўйиннинг олдинги юзасида катталашган бўқоқ кўриниб туради, йодтиреоглобулин синтези тезлиги ортади. Қон плазмасида йодтиронинлар концентрациясининг 2-5 марта ортиши тиреотоксикозга олиб келади.
Тиреотоксикознинг характерли белгилари мушаклар ҳолсизлиги, иштаҳанинг кучайиши ва овқат талабининг ортиши билан бир вақтда вазн йўқотиш (манфий азот баланси) ва тана ҳароратининг ортишидир. Бу касаллик белгилари анаболик ва катаболик жараёнларнинг бир вақтда кучайиши билан тушунтирилади, лекин тана массасининг йўқотилиши катаболизм жараёни тезлигининг устунлик қилишидан далолат беради. Бунинг сабабларидан бири Na⁺,K+-ATФазанинг синтези ёки активлигининг ортганлиги бўлиши мумкин, натижада ҳужайралараро суюқлик ва ҳужайра ўртасида ион алмашинуви тезлашади. Натрий насосининг ишлаши учун катта миқдорда АТФ сарфи талаб қилинади (нормада натрий насоси организмда синтезланадиган АТФнинг 20 % ини сарфлайди). Тиреотоксикозда АТФ сарфининг ортиши катаболизм жараёни тезлигининг ва АТФ синтезининг ҳам ортишига олиб келади. Диффуз токсик бўқоқ билан касалланган беморларда асосий алмашинув соғлом одамларга нисбатан 30–60 %га ошган бўлади.
Диффуз токсик бўқоқ касаллигининг келиб чиқиш сабаби маълум эмас. Бемор қонида йодтиронинлар концентрацияси юқори бўлганлиги сабабли тиреотроп гормон миқдори пасайган бўлади, бу гипоталамо-гипофизар бошқарув нормада ишлаётганини кўрсатади. Беморларнинг тахминан ярмининг қонида иммуноглобулин аниқланади, бу иммуноглобулин қалқонсимон без ҳужайралари мембранасидаги тиреотроп гормони билан боғланадиган рецепторларга танлаб таъсир эта олади ва тиреотроп гормонининг таъсирини имитация қилиб, йодтиреоглобулин синтезини стимуллайди. Бундай ҳолатларда қалқонсимон безнинг гиперфункцияси организмнинг ўз тўқималари оқсилларига қарши антитаналарнинг ҳосил бўлиши билан борадиган иммун реакциялар оқибатидир.