13-боб қАЛҚонсимон без гормонлари

13-БОБ
ҚАЛҚОНСИМОН БЕЗ ГОРМОНЛАРИ
13.1. Қалқонсимон без гормонларининг тузилиши ва синтези
Қалқонсимон без йодтиронинларни — тироксин (тетрайодтиронин, Т₄) ва трийодтиронин (Т₃) ни синтезлайди ва секреция қилади. Йодтиронинлар тирозиннинг йод билан бириккан ҳосиласидир (13.1-расм).

13.1-расм. Йодтиронинларнинг тузилиши

Йодтиронинлар синтезида тиреоглобулин оқсили иштирок этади, у йод билан бирикиб йодтиреоглобулинга айланади. Тиреоглобулин молекуласидаги айрим тирозин қолдиқларига махсус ферментлар иштирокида йод бириктирилади. Бунда тирозин қолдиқлари моно- ва дийодтирозинларга айланади. Кейин икки йодтирозиннинг конденсацияланиши натижасида оқсилнинг пептид занжирига кирувчи йодтиронин ҳосил бўлади (13.2-расм). Агар икки йодланган тирозин қолдиқларидан бири монойодтирозин бўлса, трийодтиронин ҳосил бўлади.

Йодтиреоглобулин — молекуляр массаси 660000 бўлган оқсил, гликопротеин, 0,5-1 % йод сақлайди.
Тиреоглобулинлар синтези қалқонсимон безнинг кубсимон эпителий ҳужайраларида содир бўлади. Бу ҳужайралар бир қават бўлиб жойлашиб фолликулалар ҳосил қилади, бу фолликулалар бўшлиғига эса тиреоглобулин секреция қилинади ҳамда у ерда йодланади. Фолликулалар коллоид деб номланувчи гомоген гель билан тўлган, унинг асосий таркибий қисми қалқонсимон без гормонларининг заҳира шакли бўлган йодтиреоглобулиндир.

13.2-расм. Йодтиронинлар синтези
Йодтиреоглобулин фолликулалар бўшлиғидан эндоцитоз йўли билан яна ҳужайрага киради. Эндоцитоз пуфакчаси лизосома билан қўшилади ва йодтиреоглобулин лизосома ферментлари ёрдамида гидролизланади. Натижада қонга секреция қилинувчи эркин йодтиронинлар ҳосил бўлади.