10-мавзу: фуқаролик ва хўжалик ишларида судловлик асосий саволлар

ФПКнинг 103-моддасига биноан суд харажатларининг турлари иккита:
1.Давлат божи.
2.Ишни кўриш билан боғлиқ чиқимлардан иборатдир.
Давлат божи суд томонидан Фуқаролик ишининг юргизилиши муносабати билан қилинадиган харажатлар учун олинадиган хақ бўлиб кўрилади.
Давлат божи судларга даъво аризалари, органлар ва мансабдор шахсларнинг хатти-харакатлари устидан шикоятлар, алохида тартибда юритиладиган ишлар бўйича аризалар, судларнинг хал қилув қарорлари устидан апэлляция, кассация тартибида шикоятлар ва назорат тартибида протест келтириш тўғрисида аризалар берганлик учун, шунингдек судлар томонидан хужжатларнинг нусхалари берилганлиги учун қонун хужжатларида белгиланган тартибда ва миқдорда ундирилади (104-м).
Давлат божи фуқаролардан хам, корхоналар, муассасалар, ташкилотлардан хам олинади.
Ишни кўриш билан боғлиқ бўлган чиқимларга ФПКнинг 109-моддасига кўра қуйидагилар киради:
1. Гувохлар, экспертлар, мутахассислар, таржимонларга тўланиши лозим бўлган суммалар;
2. Жойга бориб кўздан кечириш билан боғлиқ бўлган харажатлар;
3. Ушбу кодекснинг 140- моддасида назарда тутилган холларда жавобгарларни қидириш учун қилинган харажатлар;
4. Суднинг хал қилув қарорини ижро этиш билан боғлиқ харажатлар.
Суд идораларида кўриладиган Фуқаролик ишлари бўйича хамма холларда хам суд харажатлари ундираверилмайди.
Қонунга биноан суд ёки судя фуқароларнинг мулкий аҳволига қараб, тарафларнинг бири ёки хар иккаласини хам давлат даромадига ундириладиган суд харажатларини тўлашни кечиктиришга ёки бўлиб - бўлиб тўлашга йўл қўйиши, шунингдек бу харажатларнинг тўлашини кечиктиришга ёхуд тўлашдан бутунлай озод қилиши мумкин.
Суд жарималари деб, процессуал бурчларини ёки суд мажлисидаги тартибни бузишда айбли бўлган шахсларга, қонунда кўрсатилган холларда пул билан белгиланган процессуал таъсир этиш чорасига айтилади.