1. Tibbiy faoliyatni litsenziyalash tartibi to‘g‘risidagi nizom ilovaga muvofiq tasdiqlansin



O‘zbekiston Respublikasi Vazirlar Mahkamasining
qarori
Tibbiy faoliyatni litsenziyalash tartibini yanada takomillashtirish chora-tadbirlari to‘g‘risida
O‘zbekiston Respublikasining “Faoliyatning ayrim turlarini litsenziyalash to‘g‘risida”gi Qonuniga muvofiq hamda O‘zbekiston Respublikasi Prezidentining “Sog‘liqni saqlash sohasida xususiy sektorni yanada rivojlantirish chora-tadbirlari to‘g‘risida” 2017-yil 1-apreldagi PQ-2863-son qarorini bajarish maqsadida Vazirlar Mahkamasi qaror qiladi:
1. Tibbiy faoliyatni litsenziyalash tartibi to‘g‘risidagi nizom ilovaga muvofiq tasdiqlansin.
2. Belgilab qo‘yilsinki:
Litsenziya talablari va shartlari litsenziya olish yoki litsenziyaning amal qilish muddatini uzaytirish uchun yangidan ariza bergan tibbiy muassasalarga, shuningdek litsenziyani qayta rasmiylashtirish uchun murojaat qilgan faoliyat yurituvchi litsenziatlarga tatbiq etiladi;
tibbiy faoliyatni amalga oshirish uchun avval berilgan litsenziyalar ularning amal qilish muddati tugagungacha amal qiladi.
3. O‘zbekiston Respublikasi Sog‘liqni saqlash vazirligi bir oy muddatda quyidagilarni tasdiqlasin:
ular bo‘yicha tibbiy faoliyat amalga oshirilayotgan tibbiy ixtisosliklar turlari nomenklaturasi;
tibbiy ixtisoslashuvning tegishli turini amalga oshirish uchun zarur bo‘lgan moddiy-texnik baza, asbob-uskunalar va boshqa texnik vositalar, shu jumladan tibbiy texnikaga eng kam talablar, shuningdek tibbiy tashkilotning turidan kelib chiqib aniqlanadigan tibbiy uskunaning ma’nan eskirganligi darajasini aniqlovchi mezonlar;
tegishli mutaxassislikka ega vrachlar tibbiy ixtisoslashuvining litsenziyalanadigan turlari bo‘yicha vrachlar lavozimini egallashi mumkin bo‘lgan tibbiy mutaxassisliklar ro‘yxati;
litsenziyani olish, uzaytirish va qayta rasmiylashtirish bo‘yicha arizalar shakllari;
litsenziya berish yoki litsenziya berishni rad etish to‘g‘risidagi ekspert xulosasining shakli.
4. O‘zbekiston Respublikasi Sog‘liqni saqlash vazirligi:
manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin;
ikki oy muddatda O‘zbekiston xususiy amaliyot vrachlari uyushmasi bilan birgalikda nodavlat tibbiy tashkilotlar o‘rtasida ushbu qaror qoidalarini bajarish bo‘yicha keng tushuntirish ishlarini amalga oshirsin.
5. Ushbu qaror 2017-yil 1-iyuldan boshlab kuchga kiradi.
6. Vazirlar Mahkamasining “Tibbiy faoliyatni litsenziyalash tartibi to‘g‘risida” 2012-yil 29-martdagi 92-son qarorining (O‘zbekiston Respublikasi QT, 2012-yil, 3-son, 21-modda) 1-bandi, shuningdek qarorga 1 va 2- ilovalar 2017-yil 1-iyuldan boshlab o‘z kuchini yo‘qotgan deb hisoblansin.
7. Mazkur qarorning bajarilishini nazorat qilish O‘zbekiston Respublikasi sog‘liqni saqlash vaziri A.K. Shadmanov zimmasiga va O‘zbekiston Respublikasi Vazirlar Mahkamasining Sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari axborot-tahlil departamentiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2017-yil 21-iyun,
405-son
Vazirlar Mahkamasining 2017-yil 21-iyundagi 405-son qaroriga
ILOVA
Tibbiy faoliyatni litsenziyalash tartibi to‘g‘risida
NIZOM
1-bob. Umumiy qoidalar
1. Ushbu Nizom tibbiy faoliyatni litsenziyalash tartibini belgilaydi.
2. Ushbu Nizomda quyidagi asosiy tushunchalar qo‘llaniladi: