1-Tema. Kirisiw Qaraqalpaq tili mámleketlik til. Qaraqalpaq jazıwı hám onıń tariyxı Tayanısh sózler

Kásiplik awqam shólkemi

İsenim xat - qanday da bir mekeme, shólkem yaki bir adamnıń isenim bildiriwshiniń ekinshi bir adamǵa (isenim bildirgen adamına) belgili jumıslardı atqarıwǵa yamasa materiallıq baylıqlardı alıwǵa huqıq beriletuǵınlıǵı haqqında gúwalıq beriwshi jazba hújjet.

Óziniń xızmeti boyınsha isenim xatlar eki toparǵa bólinedi rásmiy túrdegi isenim xatlar hám jeke puqaralar tárepinen beriletuǵın isenim xatlar.

Rásmiy túrdegi xatlarda olardıń múddeti kórsetilgen boladı. Olar bir neshe jılǵa shekem bolǵan (úsh jıldan artıq bolmaydı) múddet ushın beriliwi múmkin. Eger isenim xatta múddeti anıq kórsetilmegen bolsa, bunday jaǵdayda ol berilgen kúnnen baslap bir jıl dawamında óziniń kúshin saqlaydı. Berilgen kúni kórsetilmegen isenim xat haqıyqıy emes.

Rásmiy túrdegi isenim xatlar, ádette, tipografiyalıq usıl menen orınlanǵan blanklerde (qaǵazda) jazıladı. Eger arnawlı blankler bolmaǵan jaǵdayda isenim xatlar ápiwayı qaǵazǵa jazıladı hám onıń joqarı shep qaptalına isenim xat beriwshi mekemeniń tórt múyeshli móri basıladı.

Rásmiy isenim xatlar tómendegi bólimlerden turadı

1. İsenim xattı beriwshi mekemeniń atı.

2. İsenim xattıń qatar sanı hám berilgen waqtı (sánesi).

3. İsenim xat berilip atırǵan adamnıń lawazımı hám tolıq atı (ismi, ákesiniń atı, familiyası).

4. Qımbat bahalı buyımlar alınatuǵın mekemeniń atı.

5. İsenim xattıń beriliw sebebi.

6. İsenim xattıń háreket etiw múddeti.

7. İsenim xat berilip atırǵan adamnıń qoyılǵan qolı.

8. Materiallıq buyımlardı alıwshınıń kim ekenligin tastıyıqlawshı hújjettiń atı (pasport).

İsenim xattıń bólimleri anıq, ózgertiwsiz yamasa dúzetiwlersiz rásmiylestiriliwi kerek.

İsenim xattıń ekinshi túri - bul jeke, yaǵnıy ayırım adamlar tárepinen basqa bir adamǵa belgili bir jumıstı orınlaw ushın isenim bildirip berilgen jazba hújjet.

Jeke isenim xatlardıń eń kóp tarqalǵan túri - bul aqsha (aylıq, napaqa hám basqalar) alıw ushın jazılǵan isenim xat.

Jeke isenim xat, ádette, qol menen jazıladı hám onda tómendegi zárúrli bólimler bolıwı shárt

1. Hújjettiń atı (İsenim xat).

2. İsenim bildiriwshiniń tolıq atı (ismi, ákesiniń atı, familiyası).

3. İsenim xat berilgen adamnıń tolıq atı (ismi, ákesiniń atı, familiyası).

4. İsenim xattıń mazmunı (tapsırılǵan wazıypalar anıq kórsetiledi).

5. Tapsırılǵan wazıypalar ámelge asırılıwı zárúr bolǵan mekemeniń atı.

6. İsenim bildiriwshiniń qolı.

7. Berilgen (yamasa jazılǵan) waqtı (sánesi).

8. İsenim bildiriwshiniń qoyǵan qolın tastıyıqlaǵan adamnıń lawazımı hám qolı.

9. İsenim bildiriwshiniń qoyǵan qolı tastıyıqlanǵan sáne hám dóńgelek mór.