1. Saylov huquqi fani predmeti, maqsad va vazifalarini batafsil muhokama qiling

YO‘RIQNOMA
Mazkur Yo‘riqnoma O‘zbekiston Respublikasining Saylov kodeksi, Budjet kodeksi, “Siyosiy partiyalarni moliyalashtirish to‘g‘risida”gi qonuniga muvofiq ishlab chiqilgan bo‘lib, O‘zbekiston Respublikasi Prezidenti, Oliy Majlisi Qonunchilik palatasi, Qoraqalpog‘iston Respublikasi Jo‘qorg‘i Kengesi, Xalq deputatlari viloyat, tuman va shahar kengashlari deputatlari saylovlariga tayyorgarlik ko‘rish va ularni o‘tkazish bilan bog‘liq xarajatlarni moliyalashtirish hamda ulardan foydalanish tartibini belgilaydi.
1-bob. Umumiy qoidalar
1. Ushbu Yo‘riqnoma O‘zbekiston Respublikasi Markaziy saylov komissiyasi (bundan buyon matnda MSK deb yuritiladi), Qoraqalpog‘iston Respublikasi Markaziy saylov komissiyasi, viloyat, tuman va shahar saylov komissiyalari, okrug saylov komissiyalari (bundan buyon matnda OSK deb yuritiladi) va uchastka saylov komissiyalari (bundan buyon matnda USK deb yuritiladi), davlat hokimiyati va boshqaruvi organlari, siyosiy partiyalar uchun majburiydir.
2. Saylovlarga tayyorgarlik ko‘rish va uni o‘tkazish bilan bog‘liq barcha xarajatlarni moliyalashtirish O‘zbekiston Respublikasi Davlat budjeti mablag‘lari hisobidan amalga oshiriladi.
3. Chet davlatlarning, ular jismoniy va yuridik shaxslarining hamda xalqaro tashkilotlarning mablag‘lari hisobidan saylovni moliyalashtirish hamda nomzodlar va siyosiy partiyalarni moddiy jihatdan boshqacha tarzda qo‘llab-quvvatlash taqiqlanadi.
Bunday mablag‘lar yoki moddiy yordam kelib tushgan taqdirda ular kelib tushgan kundan boshlab bir oy muddat ichida xayriya subyektiga qaytarilishi, qaytarish imkoniyati bo‘lmagan taqdirda esa, belgilangan tartibda Davlat budjeti daromadiga o‘tkazilishi lozim.
4. Siyosiy partiyalar, boshqa jamoat birlashmalari, korxonalar, muassasalar, tashkilotlar va fuqarolar saylov o‘tkazish uchun o‘z mablag‘larini ixtiyoriy ravishda berishi mumkin. Bu mablag‘lar MSK tomonidan mazkur Yo‘riqnomaning 4-bobida belgilangan tartibda saylov kampaniyasi jarayonida ulardan foydalanish uchun qabul qilib olinadi va foydalaniladi.
5. O‘zbekiston Respublikasi Prezidenti, Oliy Majlisi Qonunchilik palatasi, Qoraqalpog‘iston Respublikasi Jo‘qorg‘i Kengesi, Xalq deputatlari viloyat, tuman va shahar kengashlari deputatligiga nomzodlarni va siyosiy partiyalarni saylovda ishtirokini boshqa manbalar hisobidan moddiy va moliyaviy ta’minlash, shu jumladan tovar yetkazib berish, ishlarni bajarish, xizmat ko‘rsatish tarzida hamda moddiy jihatdan boshqacha ko‘rinishda qo‘llab-quvvatlash taqiqlanadi.