1-qism dub daraxti bilan qoʻziqorin

1,2-nazorat ishi. 3-sinf. OʻTOʻS

1-qism
DUB DARAXTI BILAN QOʻZIQORIN
Yosh dub daraxtining yonginasidan qoʻziqorin oʻsib chiqibdi, oʻzi semiz, qalpogʻi bir yoqqa qiyshaygan emish.
– Amaki, necha yoshga kirdingiz? – deb soʻrabdi u dub daraxtidan.
– Beshga qadam qoʻydim, – debdi dub.
– Men endigina dunyoga keldim. Shunday boʻlsa ham, sizga yetay deb qolibman-a. Shu oʻsishda ketaversam, keyin nima boʻladi? Amaki chetroqqa chiqib tursangiz-chi, menga joy torlik qilib qoladiganga oʻxshaydi, – debdi qoʻziqorin.
– Hovliqma! Uch-toʻrt kun sabr qil-chi, u yogʻi nima boʻlishini keyin koʻramiz, – debdi dub daraxti.
Bir kun oʻtibdi, ikkinchi kun ham oʻtibdi. Qoʻziqorin kunlab emas, soatlab oʻsaveribdi. Dub daraxti uning bu oʻsishidan tashvishga tushib qolibdi. Lekin qoʻziqorin uchinchi kuniga oʻtganda bir yonga qarab egilib ketaveribdi.
– Dub amaki, siz hali ham tik turibsizmi? – debdi qoʻziqorin.
– Ha, turibman, – debdi dub.
– Men yonboshimga qiyshayib ketyapman, boshimga ham bir balo boʻlganga oʻxshaydi, – debdi qoʻziqorin.
Koʻp oʻtmay qoʻziqorin yiqilib tushibdi. Dub daraxti boʻlsa hali ham turganmish.


TEST TOPSHIRIQLARI
1. Qoʻziqorin maqtanchoq edi.
A) toʻgʻri B) notoʻgʻri


2. Qoʻziqorin uch kun davomida tik oʻsdi, keyin egilib ketdi?
A) toʻgʻri B) notoʻgʻri


3. Qoʻziqorin kunlab emas, soatlab oʻsaveribdi. Ushbu gap orqali muallif nima demoqchi?
A) qoʻziqorin juda tez oʻsibdi B) qoʻziqorin kunduzi oʻsmabdi
D) qoʻziqorin har soatda oʻsibdi E) qoʻziqorin baland boʻlib ketibdi


4. Qoʻziqorin dub daraxtida nega siz hali ham tik turibsizmi deb soʻradi?
A) boshi katta boʻlib koʻzini toʻsib qoʻygan edi
B) qiyshayganidan koʻzini narsalar toʻsib qolgan edi
D) oʻzi qiyshayib qolgani uchun daraxt ham shunday koʻringan edi
E) shunday deyish bilan daraxtning jahlini chiqarmoqchi boʻlgan edi