1. Mikroblarni umumiy soni aniqlash. Koli-litr va stafilokokklarni aniqlash

Qo‘ldan sinama olish. Sinama chap qo‘ldan boshlab olinadi. Avval qo‘lning yuzasidan barmoqlar tomon harakatlantiriladi, so‘ng shu yo‘sinda qo‘lning ichki qismidan barmoqlar orasidan va tirnoqlar orasidan olinadi. Mana shu tampon bilan yuqorida aytib o‘tilgandek, o‘ng qo‘ldan ham olinadi.
Buyumlardan sinama olish. Yuzasi keng bo‘lgan buyumlarning bir necha qismidan 50x50, 100x100 sm.li trafaret yordamida olinadi. Trafaret simdan yasalgan bo‘lib, ishlatishdan oldin spirt alangasida qizdirib olinadi.
Ichak guruhi bakteriyalariga tekshirish

1. 
   kun. Laboratoriyaga keltirilgan sinamalar Koda muhitiga ekiladi.
   

Termostatga 37°C haroratda 24 soat qoldiriladi.

2. 
   kun. Agar tekshirish materialida ichak tayoqchasi bo‘lsa, muhit­ning rangi o‘zgaradi. Mana shu muhitdan olib, Endo muhitiga ekiladi. Termostatga 37°C haroratda 24 soat qoldiriladi.
   
3. 
   kun. Endo muhiti tekshiriladi. Agar yaltiroq metall, malina rangli koloniyalar hosil bo‘lgan bo‘lsa, surtma tayyorlab tekshiriladi va sxema asosida ishlar o‘tkaziladi.
   

Stafilokokka tekshirish
Tekshirishga olib kelingan yuvindi tuxum sarig‘i qo‘shilgan tuzli agarga va 6,5 % li tuzli sho‘rvaga ekiladi. Termostatga 37°C haro­ratda 24 soat qoldiriladi. Agar stafilokokka xos koloniyalar hosil bo‘lgan bo‘lsa, stafilokokka tekshirish ishlari o‘tkaziladi.
Mikroblarning umumiy sonini aniqlash

1. 
   kun. 2 ml.li fiziologik eritmadagi yuvindiga 8 ml fiziologik eritma qo‘shiladi. Shunda 1 : 5 nisbatli eritma hosil bo‘ladi. Tampon u bilan yaxshilab aralashtiriladi. 1 ml olib 45°C gacha sovitilgan GPA solinadi va Petri kosachasiga quyiladi. Termostatga 37°C haroratda 14 soat qoldiriladi.
   
2. 
   kun. Ekilgan muhit tekshiriladi. Koloniyalar kam bo‘lsa, oddiy ko‘z bilan, agar ko‘p bo‘lsa, koloniya sanaydigan asbobda sanaladi. So‘ng 1 sm yuzadagi koloniyalar soni sanaladi.
   

Xirurgik va bog‘lov materiallarini sterillikka tekshirish
Tekshirish aseptik sharoitda bokslarda olib boriladi. Aerob va anaerob mikrofloraga tekshiriladi.
Tekshirish olib borish uchun quyidagilar kerak bo‘ladi:

1. 
   Steril asboblar to‘plami (qaychi, kornsanglar, pinsetlar).
   
2. 
   10 % li steril giposulfit eritmasi.
   
3. 
   Steril distillangan suv.
   
4. 
   Xottinger shakarli sho‘rvasi. Saburo muhiti va tioglikol muhitlari.
   

Material sterilizatsiya qilingan kuni olinib, yopiq va muhrlangan byukslarda tekshirishga yuboriladi. Tekshirishga bint, tampon, paxta sharchalar, doka salfetkalar va bog‘lov (ketgut va ipak) materiallari olinadi. Tekshirishga keltirilgan materiallar steril pinsetda olinib, spirt alangasi oldida har xil qismlaridan qirqib olinadi va steril Petri kosachasiga solinadi. Har bir sinamadan olib, shakarli sho‘rva va Saburo muhitlariga ekiladi.