1-Мавзу: Ўзбекистон миллий тараққиётининг янги босқичида фуқаролик жамиятининг шаклланиши ва ривожланиши

Биринчидан, мамлакатни ижтимоий-иқтисодий ривожланиш стратегияси республиканинг ўзига хос иқлими, табиий шарт шароитлари, географик жойлашуви, халқнинг тарихий турмуш тарзи ва тафаккур даражасидан, миллий қадриятлари, анъаналари ҳамда урф-одатларидан келиб чиққан.
Иккинчидан, Республикадаги ўзига хос ижтимоий-демографик вазият – ғоят муҳим хусусиятлардан биридир. Ўзбекистон Ўрта Осиё минтақасидаги аҳолиси энг кўп республика ҳисобланади (минтақа аҳолисининг 60% дан ортиғини ташкил этади). Аҳоли сони бўйича МДҲ давлатлари орасида (Россия ва Украинадан кейин) учинчи ўринни эгаллайди. Ўзбекистон ёшлар мамлакати. Болалар, ўсмирлар ва ёшларнинг умумий салмоғи тахминан 70%, яъни республика аҳолисининг 2/3 қисмидан кўпроғи ёшлардир. Бу хусусда “....ёшларимиз хақли равишда Ватанимизнинг келажаги учун жавобгарликни зиммасига олишга қодир булган, бугунги ва эртанги кунимизнинг ҳал этувчи кучига айланиб бораётгани барчамизга ғурур ва ифтихор бағишлайди. Мамлакат аҳолисининг 32 фоизини, ёки 10 миллионини 30 ёшгача бўлган ёшлар ташкил этади”, - дея қайд этган эди Президентимиз Шавкат Мирзиёев³.
Аҳоли таркибида ёшлар кўпчиликни ташкил этади. Доимо ўз аждодлари қадимдан яшаб келган жойга боғланганлик, бир жойда муқим яшашга мойиллик Республика аҳолисига хос хусусиятдир.
Учинчидан, кишиларнинг муайян ижтимоий, иқтисодий, сиёсий ҳуқуқ ва эркинликларининг таъминланганлиги, онги, руҳияти ҳам Ўзбекистонни ижтимоий-қтисодий тараққиётида муҳим омилдир.
Ўзбекистонни ривожлантириш стратегияси бир вақтнинг ўзида фуқаролик жамияти билимлар билан ҳам чамбарчас боғлангандир. Масалан, фуқаро, жамият, фуқаролик жамияти, давлат, ҳуқуқий давлат, сиёсий институтлар, фуқаролик жамияти институтлари, фуқароларнинг ҳуқуқ ва эркинлиги, инсон ҳуқуқлари, жамиятининг ижтимоий тузилмаси, жамиятининг иқтисодий асослари, демократик институтлар, қонун устуворлиги, сайлов, сайлов ҳуқуқи, фуқаровийлик, фуқаро фаоллиги, юрт тинчлиги, Ватан равнақи, халқ фаровонлиги, юксак маънавият, дахлдорлик ҳисси, оммавий ахборот воситаларини эркинлаштириш, ўзини ўзи бошқариш, миллатлар ва конфессиялараро тотувлик, жамоатчилик назорати, давлат органлари фаолиятининг очиқлиги, ижтимоий шериклик кабилар бир қанча асосий тушунчаларни ҳам ўз ичига олади.
Ўзбекистонни ривожлантириш стратегияси ва фуқаролик жамияти қуйидаги методларига таянади.