1-Mavzu: Zamonaviy pedagogik texnologiyalar turlari. (2 soat). Reja

Ta’lim texnologiyasi – pedagogik texnologiyaning ilmiy aspektini belgilash uchun ishlatiladi. Bu (fan predmeti) «texnika va inson resurslarini hamda ularning o‘z oldiga ta’lim shakllarini optimallashtirish vazifasini qo‘yuvchi hamkorligini hisobga olgan holda dars berish va bilimlarni o‘zlashtirishning barcha jarayonlarini yaratish, qo‘llash va belgilashning tizimli usuli».

O‘quv jarayoni texnologiyasi alohida olingan bitta darsga, bitta mavzuga yoki o‘quv predmetining bir qismiga va butun o‘quv predmetiga tuzib chiqilishi mumkin.

Pedagogik texnologiyani yaratish tamoyillarining birinchisi – muayyan dars, mavzu, qism, o‘quv predmetidan kutilgan asosiy maqsadni shakllantirib olish; ikinchisi – umumiy maqsaddan kelib chiqib darsni yoki o‘quv predmetini modullarga ajratib, har bir moduldan kutilgan maqsadni va modullar ichida hal qilishi lozim bo‘lgan masalalar tizimini aniqlab olish; uchinchisi- modul ichida yechiladigan masalalarning har biri bo‘yicha test savollarini tuzib chiqish; to‘rtinchisi - maqsadlar aniq bo‘lib, test savollari tuzilgandan keyin, maqsadlarga yetish usullari tanlanib, ularni ishlatadigan aniq joylarni belgilab olish. Ta’lim jarayoniga texnologik yondashuv paytida, avval aytib o‘tganimizdek, yondashuv tamoyiliga binoan dars qismlari orasidagi zaruriy bog‘liqliklarga va fanlararo aloqalarga alohida e’tibor qaratiladi. Bu pedagogik texnologiyaning beshinchi tamoyili hisoblanadi.

Ta’limga texnologik yondashuvning tub mohiyati, maqsadini tushunish uchun, bir-biridan keskin farq qiluvchi an’anaviy tushuntirish-ko‘rsatmali, texnologik va qidiruv-ijodiy ta’lim turlarini qarashga o‘tamiz. Dastavval, ularning eng umumiy belgilarini taqqoslash asosida o‘rganamiz. Bu mazkur mavzu boshqa masalalarni qarashda pedagogik texnologiyaning barcha tomonlari bilan batafsil tanishishga imkon beradi.