1 ma’ruza mashg‘uloti

11 - MA’RUZA MASHG‘ULOTI


Darslikka qo‘yiladigan talablar.
Ma’ruza rejasi:
1. Umumiy o‘rta ta’lim maktablari ona tili darsligining tarkibi va mazmuni.
2. Umumiy o‘rta ta’lim maktablari ona tili dasturining tarkibi va mazmuni.
3. Maktab “Ona tili” darsliklari uchun “O‘qituvchi kitoblari” yoki darsliklarga yozilgan o‘quv qo‘llanmalar.
4. Lug‘atlar va qomuslarning ona tili darslarini tashkil etishdagi o‘rni.
O‘quv mashg‘ulotining maqsadi: Talabalarga ona tili darsliklariga qo‘yiladigan talablar bo‘yicha, uzluksiz ta’limning DTS va o‘quv dasturilari mazmuni ta’lim va tarbiya jarayonlarini tashkil etishda darsliklarning o‘rni va ahamiyati bo‘yicha tushuncha berishdan iborat.
Tayanch tushunchalar: davlat ta’lim standarti, ta’lim standarti, umumiy o‘rta ta’lim, tayanch o‘quv reja, dastur, namunaviy o‘quv dasturi, ishchi o‘quv dasturi, ishchi o‘quv reja, darslik, elektron darslik, o‘quv qo‘llanmalar.
MAVZUNING QISQACHA MAZMUNI
Umumiy o‘rta ta’lim maktablarining “ona tili” darsliklari davlat ta’lim standartlari talablariga mos, o‘rnatilgan tartibda tasdiqlangan fanning o‘quv dasturi asosida mavzularni to‘liq yoritgan va fanning asoslarini o‘rganishga yordam beruvchi nashr hisoblanadi. Maktabda o‘rganiladigan barcha sinflar uchun yaratilgan darsliklar bir-biriga bog‘liq holda tuziladi va ta’limning uzviyligiga amal qiladi. Darslik davlat ta’lim standartida belgilangan bilim, ko‘nikma va malakalarni shakllantirishga xizmat qiladi.
Darslik nafaqat bilim va ma’lumot beruvchi, balki o‘quvchini o‘ziga jalb etadigan, qiziqtiradigan noyob kitob bo‘lishi shart. Ona tili darsligi – ta’limning muhim vositasi. Uning zimmasiga, asosan, quyidagi vazifalar yuklatiladi:
- o‘zbek tilining fonetikasi, leksikasi va grammatikasi bo‘yicha nutqning og‘zaki va yozma shakllaridan keng va to‘g‘ri foydalanish uchun zarur bo‘lgan ilmiy-amaliy ma’lumotlar berish;
- o‘quvchilarni o‘zbek tilida to‘g‘ri talaffuz qilishga o‘rgatish, imlo va punktuatsiyaning asosiy qoidalari bilan qurollantirish;