1-basqısh (20 minut) Ózbekstan respublikasíndaǵÍ ekonomikalíQ

SHAVKAT MIRZIYOYEV ÓZBEKSTAN RESPUBLIKASÍ PREZIDENTI LAWAZÍMÍNA KIRISTI
Tashkentte 2021-jıl 6-noyabr kúni Ózbekstan Respublikası Prezidentiniń óz lawazımına kirisiwine baǵıshlanǵan saltanatlı máresim bolıp ótti.

Máresimde Oliy Majlis Senatınıń aǵzaları hám Nızamshılıq palatasınıń deputatları, mámleketlik hám jámiyetlik shólkemlerdiń basshıları, diplomatiyalıq korpus wákilleri, jergilikli hám sırt el ǵalaba xabar qurallarınıń xızmetkerleri qatnastı.

Ilajdı Ózbekstan Respublikası Oraylıq saylaw komissiyasınıń Baslıǵı Z.Nizomxojaev ashıp berdi. Ol 24-oktyabr kúni bolıp ótken Prezident saylawı demokratiyalıq principler tiykarında, jedel siyasiy báseki ortalıǵında ótkenin atap ótti. Isbilermenler háreketi – Ózbekstan Liberal-demokratiyalıq partiyasınan talaban Shavkat Miromonovich Mirziyoyev saylawshılardıń 80,12 procent dawısı menen Ózbekstan Respublikası Prezidenti etip saylanǵanın atap ótti.

Oraylıq syalaw komissiyasınıń Baslıǵı qatnasıwshılar atınan Shavkat Mirziyoyevti qutlıqladı hám oǵan Ózbekstan Respublikası Prezidenti gúwalıǵın tapsırdı.

Prezident Ózbekstan Respublikası Konstituciyasınıń 92-statyasına muwapıq, ant berdi:

«Ózbekstan xalqına sadıqlıq penen xızmet etiwge, respublikamızdıń Konstituciyası hám nızamlarına qatań ámel etiwge, puqaralardıń huqıqları menen erkinliklerine kepillik beriwge, Ózbekstan Respublikası Prezidentine júklengen wazıypalardı hújdanlı orınlawǵa saltanatlı ant etemen», dedi Shavkat Mirziyoyev.

Mámleketimizdiń gimni jańladı.

Ózbekstan Respublikası Prezidenti Shavkat Mirziyoyev kelesi bes jılǵa mólsherlengen tiykarǵı baǵdarlar haqqında shıǵıp sóyledi.

– Xalqımız talapların esapqa alǵan halda, biz Jańa Ózbekstan rawajlanıw strategiyasın islep shıqtıq hám saylaw procesinde onı ózine tán ulıwma xalıqlıq dodalawdan ótkerdik,-dedi mámleket basshısı. – Bul áhmiyetli konceptuallıq hújjette reformalarımızdıń izbe-izligin hám dawamlılıǵın támiyinlew maqsetinde, «Háreketler strategiyasınan – Rawajlanıw strategiyasına» degen princip tiykarǵı ideya hám bas norma sıpatında kún tártibine qoyıldı.

Atap ótilgenindey, bul rawajlanıw strategiyası jeti baǵdardan ibarat.

Birinshi baǵdar erkin puqaralıq jámiyetin rawajlandırıw arqalı xalıqshıl mámleket qurıwǵa qaratılǵan. Onıń ushın keleshekte mámleket funkciyalarınıń úlken bólegi oraydan aymaqlarǵa ótkeriledi. Hár bir máhállede hákim járdemshisi lawazımı engiziledi. Rayon byudjeti qosımsha dárekler menen támiyinlenip, máhálleniń ayrıqsha qorı qáliplestiriledi. Oraylıq uyımlar transformaciyalanıp, qolaylı hám nátiyjeli basqarıw sisteması jaratıladı, birdey baǵdardaǵı wazıypalardı ámelge asırıp atırǵan uyımlar optimallastırıladı.

– Basshı xalıqqa júk bolmawı, kerisinshe, xalıqtıń júgin moynına alıwı kerek, – dedi Prezident.

Ekinshi baǵdar ádillik hám nızam ústinligin bekkemlew, insan qádir-qımbatın támiyinlew wazıypaların qamtıp alǵan. Usı maqsette sudlaw sisteması hám advokatura institutı, huqıq qorǵaw uyımlarınıń jumısı jetilistiriledi. Isbilermen hám múlk iyeleri huqıqların qorǵaw kúsheytiledi. Korrupciyanı saplastırıwǵa mámleket hám jámiyettiń barlıq kúsh hám quralları jumsaladı. Onda ayıpkerlerdi huqıqıy juwapkershilikke tartıw menen sheklenip qalmastan, korrupciyanıń sebeplerin aldınan saplastırıw ilajları kóriledi.

Úshinshi baǵdarda milliy ekonomikanı rawajlandırıw baǵdarındaǵı rejeler bildirildi. 2030-jılǵa barıp, jan basına esaplaǵanda, xalıqtıń dáramatları ortasha kórsetkishten joqarı bolǵan mámleketler qatarına shıǵıw maqset etilgeni aytıldı.

Oǵan, bárinen burın, jeke menshik sektordı xoshametlew hám onıń úlesin arttırıw jáne tikkeley sırt el investiciyaların tartıw esabınan erisiledi. Makroekonomikalıq turaqlılıqtı támiyinlew, inflyaciya dárejesin belgilengen 5 procentke azaytıw ilajları kóriledi.

Xalıqtı turaq jay hám taza ishimlik suwı menen támiyinlew, zamanagóy jol hám kommunikaciya tarmaqların qurıw, jámiyetlik transport jáne aymaqlararalıq qatnawlardı jaqsılaw boyınsha iri joybarlar ámelge asırıladı.

Tórtinshiden, sapalı tálim-tárbiya máselesi turaqlı itibar orayında bolatuǵını atap ótildi. Usı maqsette oqıtıwshılardıń aylıq miynet haqısın izbe-iz arttırıp barıw hám 2025-jılǵa barıp, 1 mıń dollar muǵdarına jetkeriw názerde tutılǵan. Jańa mektepler qurıw, barlarınıń materiallıq-texnikalıq bazasın bekkemlew, tarawdıń barlıq basqıshları arasında izbe-izlikti támiyinlewge qaratılǵan Milliy bilimlendiriw baǵdarlaması islep shıǵıladı.

Xalıqtıń salamatlıǵın saqlaw ushın barlıq sharayat jaratıladı. Kelesi bes jılda joqarı kategoriyalı shıpakerlerdiń miynet haqısın da 1 mıń dollar ekvivalentine jetkeriw mólsherlenbekte. Oálayat, rayon hám qalalarda qánigelesken medicinalıq xızmetler kólemi keńeytiledi. Mámleketlik medicinalıq qamsızlandırıw sisteması iske qosılıp, qarjı anıq nawqasqa baylanısqan halda ajıratıladı. Denetárbiya hám sporttı rawajlandırıw, salamat turmıstı engiziw áhmiyetli wazıypa bolıp qaladı.

Besinshi baǵdarǵa tiykarlanıp ruwxıy hám aǵartıwshılıq tarawlar rawajlandırıladı. Usı maqsette «Jańa Ózbekstan – máripatlı jámiyet» koncepciyası ámelge asırıladı. Mádeniyat hám kórkem ónerdi joqarılatıw, jaslardı salamat isenim ruwxında tárbiyalaw, milletleraralıq tatıwlıq hám óz-ara húrmetti bekkemlewge tiykarǵı áhmiyet qaratıladı.

Altınshıdan, global mashqalalardıń milliy hám regionallıq sheshimlerin tabıw, bul baǵdardaǵı barlıq háreketlerdi úylestiriw zárúr ekenligi atap ótildi. Atap aytqanda, ekologiyalıq qáwip-qáterlerdiń unamsız tásiri artıp baratırǵanı atap ótildi. Aral boyın ekologiyalıq innovaciyalar hám texnologiyalar aymaǵı sıpatında rawajlandırıw, Pútkil jáhán ekologiya xartiyasın islep shıǵıw máselelerine toqtap ótildi.

Jetinshi baǵdarda elimizdegi tınıshlıq hám qáwipsizlikti támiyinlew, xalıqaralıq birge islesiwdi rawajlandırıw baǵdarındaǵı wazıypalar óz kórinisin tapqan. Qurallı Kúshlerimiz qúdiretiniń jáne de arttırılıwı, áskerlerimizdiń jawıngerlik tayarlıǵı, fizikalıq hám ruwxıy tayarlıǵı kúsheytiletuǵını aytıldı.

Xalıqaralıq birge islesiwde pragmatikalıq hám tereń oylanǵan sırtqı siyasat, ekonomikalıq diplomatiya dawam ettiriledi. Bárinen burın, qońsı mámleketler hám dún'yanıń barlıq regionlarındaǵı sherikler menen óz-ara paydalı hám kóp qırlı baylanıslar keńeytiledi.

– Prezident sıpatında men elimiz tınıshlıǵı, el-xalıqtıń abadanlıǵı, Oatanımızdıń rawajlanıwı jolında pútkil barlıǵımdı baǵıshlap, xalqıma sadıqlıq penen xızmet etiwdi ómirimniń mazmunı dep bilemen. Men ushın bunnan basqa ullı maqset, baxıt-ıǵbal joq. Siz, qádirli watanlaslarımızdıń shın kewilden qollap-quwatlawıńız, nuraniy ata-analaramızdıń duwaları, áziz jaslarımızdıń isenimi maǵan úlken kúsh-ǵayrat beredi, – dep atap ótti Shavkat Mirziyoyev sóziniń sońında.

Sonıń menen Ózbekstan Respublikası Oliy Majlisi Nızamshılıq palatası hám Senatınıń qospa májilisi juwmaqlandı.