“ Maktabgacha ta’lim muassasalarida jismoniy tarbiya mashg`ulotlarini tashkil qilish va o`tkazish uslubiyoti” 5141900 «Jismoniy tarbiya va jismoniy madaniyat»

BOB BO`YICHA XULOSA

O`zbekiston mustaqilligi davrida aholining sihat-salomatligini yaxshilash, ayniqsa sog`lom ona-sog`lom bola shioriga amal qilish yo`lida beqiyos ko`p va ulkan tadbirlar olib borilayotganligi e`tibor hamda olqishlarga sazovordir. Bu yo`lda Respublika Prezidenti I.A.Karimovning chuqur ma`noli va keng qamrovli mulohazalari eng yuksak darajadagi omildir.

E`tirof etish lozimki, faqat shahar joylaridagina emas, hatto uzoq qishloqlarda ham bolalar bog`chalari talab darajasida sharoitlariga ega bo`lmoqda. Bunda bolalar yoshiga (guruh) qarab jismoniy mashqlar, harakatli o`yinlar va sport turlarining qismlari (elementlar) maqsadli tashkil etilmoqda. Bunda maxsus ishlab chiqilgan "Jismoniy tarbiya" dasturlaridan unumli foydalanilmoqda. Maktabgacha yoshdagi bolalar tarbiya muassasalari uchun "Jismoniy tarbiya" dasturlari va uslubiy qo`llanmalar hamda tavsiyanomalarni ishlab chiqish, nashrdan chiqarishda atoqli olimlar K.M.Maxkamjonov, X.A.Meliev, X.Tulenova kabilarning xizmatlari kattadir.

Harakatli o`yinlarni tanlab olishda tarbiyachi bolalarning yosh xususiyatlarii hisobga olishi hamda jismoniy mashqlarni mos ravishda belgilay olishi kerak.

Hozirgi texnika taraqqiyoti yuksalgan davrda bolalarning harakatga bo`lgan talabi uncha katta emas. Shuning uchun ham so`ngi paytlarda matbuot hamda televidenie orqali tibbiyot hamda jismoniy tarbiya va sport mutaxassislari gipodinamiya, ya`ni jismo-niy mashqlar, jismoniy mehnat, faol harakatning insoniyat faoliyatida kundan-kunga kamayib borayotganligi haqida tashvishlanib gapirmoqdalar. Bu esa navbatida, asrimizga xos yurak-tomir xastaliklarining yildanyilga ortishiga sababchi bo`lmoqda.

Harakat faolligining kamayishi, bog`cha yoshidagi bolalar uchun, ayniqsa xavflidir. Shuning uchun ham har tomonlama jismoniy tayyorgarlikni jismoniy tarbiya tizimining eng boshlang`ich pag`onasi-maktabgacha yoshdagi bolalar jismoniy tarbiyasidan boshlash kerak.

Maktabgacha yoshdagi bolalarning hayot tarziga nazar tashlasak, bog`chada bolalar ko`p vaqtlarini rasm chizish, qo`l mehnati bo`yicha vazifalarni bajarishga turli ertak va hikoyalar tinglash, televizoр ko`rish, o`tirib o`yinchoqlar o`ynashga sarf qiladilar. Natijada harakat faolligi kamayadi va yuqorida aytib o`tilgan kasalliklar yuzaga keladi.