Insoning har bir yaxshi yoki, huquqa xilof yohud jinoiy qilmishi, avvalo, uning muayyan qilmishni sodir qilish fikridan boshlanadi

1-Kazus

Namangan viloyati Uychi tumani markaziy bozorida shu viloyatning Chust tumani M.Ulug'bek mahallasi 3-uy, 6-xonadonda yashovchi 1989-yilda tug'ilgan Tulanov Akmal Ibragimovich o'zining Rossiya Federatsiyasida ishlovchi ukasi yuborgan 3000 (uch ming) AQSH dollarini “qora bozor”da almashtirish uchun kelib, 1980-yilda tug'ilgan Ishanbekov Suhrob Samandarovichga uchrashadi. Shu payt Ishanbekov ushbu pullar evaziga 25 200 000 so'm berishini aytib Tulanovdan 3000 (uch ming) AQSH dollarini oladi. Ishanbekov pulni sanab berish uchun Tulanovdan chetga o'tishini so'raydi. Ishanbekov Tulanovga kelishilgan 25 200 000 so'mni beradi va Tulanovga pullarni hammasi to'g'ri ekanligini, agar ishonmasa sanab olishi mumkinligini aytadi. Tulanov odam gavjum bo'lganligi sababli olingan pullarni sanab ko'rishdan qo'rqadi. Shu payt ularning yoniga Botirov Qudrat Muxammadjonovich kelib Tulanovning qo'lidagi 25 200 000 so'mni sanab berishini aytib pullarni oladi. Botirov pullarni sanayotgan vaqtida Tulanov va Ishanbekovlar qarab turishgan bo'lishiga qaramasdan, ularga bildirmasdan barmoqlarini tez harakatlantirib 25 200 000 so'm orasidan 2 900 000 so'm pullarni olib qo'yadi. Biroq, Uychi tumani markaziy bozori hududidagi avtomobillar turar joyida Tulanov 2 900 000 so'm pul kam ekanligini aniqlaydi. Shundan so'ng, Tulanov zudlik bilan Ishanbekovning oldiga kelib, 2 900 000 so'm pul kam chiqqanligini aytadi. So'ngra Ishanbekov va Tulanov Uychi tumani markaziy bozori chiqish eshigi yaqinida bozordan chiqib ketayotgan Botirovning ortidan yugurishadi. Birozdan so'ng Botirovga yetib olishadi va Ishanbekov bo'lib o'tgan voqeani unga aytib, pullarni qaytarishini, uning oldin ham bozorda ikki-uch marotaba shu kabi ishlar bilan shug'ullanganligini bilishini, Tulanovga 25 200 000 so'mni o'z qo'llari bilan to'g'ri sanab berganligini, uning so'zlarini tasdiqlovchi guvohlar ham borligini aytadi.Shu payt qilmishi fosh bo'lishidan qo'rqqan Botirov Ishanbekovning yuz va jag' sohasiga mushti bilan urib, qochishga urinadi. Ammo, Uychi tumani markaziy bozori hududida xizmat vazifasini o'tayotgan profilaktika inspektorlari tomonidan qo'lga olinadi. Sud-tibbiy ekspertizasining xulosasiga ko'ra Ishanbekovga sog'liqning qisqa muddatga buzilishiga olib kelgan yengil tan jarohati yetkazilganligi aniqlangan.