Эй Одам болалари! Батаҳқиқ сизларга авратингизни тӯсадиган либос ва зийнат либосини туширдик. Тақво либоси-ана ӯша яхшидир

Урфдаги либосларни кийиш ҳақида...
Аллоҳ таоло инсонларга хитоб қилиб: " Эй Одам болалари! Батаҳқиқ сизларга авратингизни тӯсадиган либос ва зийнат либосини туширдик. Тақво либоси-ана ӯша яхшидир..." дея марҳамат қилган.
Дарҳақиқат либос инсонни авратини беркитадиган ва зийнат ҳамдир. Аллоҳ таоло бу неъматни фақат инсонгагина бергандир.
Абу Довуд ва Насоийлар ривоят қилган саҳиҳ ҳадисда Молик ибн Назла Жашмий розияллоҳу анҳудан ривоят қилинади:
"Набий саллаллоҳу алайҳи васалламнинг ҳузурларига хароб кийимда келдим. У зот: "Молу мулкинг борми?" дедилар. "Ҳа" дедим. " Қайси молу мулкдан бор?" дедилар. " Туядан, қӯйдан, отдан ва қулдан" дедим. "Агар Аллоҳ сенга молу дунё берар экан, Аллоҳнинг сенга берган неъматининг ва икромининг асари кӯринсин!" дедилар."
Демак мусулмон киши Аллоҳ қодир қилганича покиза, авратини беркитадиган ва Аллоҳ ҳаром қилмаган чиройли, урфдаги либосларни кийиши жоиз экан.
Замонаммиздаги ислом олимларидан бирига мутаассиб, тор фикрларга ӯралашиб қолган бир киши шундай савол беради: "Росувлуллоҳ саллаллоҳу алайҳи васаллам қандай кийинганлар?" Яъни, айтмоқчики мен ҳақиқий суннатга мувофиқ кийинганман, сиз эса ғайри мусалмонлар кийими бӯлган кастум шим ва галстукдасиз демоқчи. Савол берувчини мақсадини тушунган олим киши:
"Росувлуллоҳ саллаллоҳу алайҳи васаллам Абу Лаҳаб кийган кийимга ӯхшаш кийимларни кийганлар." деб жавоб беради.
Набий алайҳиссалом ӯзлари яшаган даврдаги урфдаги барча кийган кийимларни кийганлар. Ӯзлари махсус кийим киймаганлар. Фақат У зотнинг либослари покизалигида, бамаънилигида ва шариат талабларида барчага намуна бӯлганлар.
Либосга оид умумий ҳукмларда уламолар шундай дейди: " Модомики, ҳаром нарсадан бӯлмаса, чиройли урфдаги кийимларни кийиш мубоҳдир. Жума, ийд ва одамлар жамланадиган йиғинлар учун манманлик ва кибрдан узоқ бӯлган ҳолда ясаниш мустаҳабдир. Ким имкони бӯла туриб, мазкур ясанишни қасддан тарк этса хато қилган бӯлади. Одамларнинг одатига хилоф кийим ҳам макруҳдир. Одатда бу каби кийимлар шуҳрат ва ажралиб туриш учун кийилади. Бундай кийим кийганларни бошқалар ғийбат қилади ва гуноҳларига у ҳам шерик бӯлади."
Шундай экан азизлар урфимиздаги шариатимиз талабларига мос келадиган покиза либосларни кийишимиз мақсадга мувофиқдир...

Исломобод жомеъ масжиди

имом хатиби: Ҳошимжон Қорабоев.