Зиёвуддин Раҳим Дилдаги гаплар СЎзбоши

ИЛМ-ФАН МИЛЛАТ ШАЪНИНИ ЮКСАЛТИРАДИ 

---

Юрт салоҳиятини маънавий омиллар белгилайди. Шунинг учун асосий эътиборни илм-фанга, 
одоб-ахлоққа қаратилса, тараққий этилади. Ривожланишни, ҳурмат-эътиборни моддиятдан излаган 
одам адашади. 
БЕҲУДА УРИНИШ 
Ҳамма нарсани билишга интилган одам, ҳатто ўзи билиши зарур илмни ҳам етук эгаллай 
олмайди. 
ЖОҲИЛЛИКНИ ТАН ОЛМАСЛИК БАЛОСИ 
Билмаслик эмас, билишга интилмаслик ёмон. 
Билмаслигини эътироф этиш яхши, лекин билмаслигини билмаслик ёки тан олмаслик мусибат. 
МАЪНАВИЙ ҚАРАМЛИК 
Ўз фикрига эга бўлмаган одам бировларга қарамдир. 
ЯХШИ ФИКРНИ ЁЗИБ ҚЎЙИШ 
Ўзингиз учун ён дафтарча тутсангиз, қандайдир саволми, фикр-мулоҳазами туғилса, ёзиб 
борасиз. Вақти келиб, унинг фойдаси тегиб қолади. 
Масалан, менда (ҳатто бир неча йилдан кейин ёзиладиган) китоб номи, унда қандай масалалар 
кўтарилиши ҳақида фикрлар келиб қолди, дейлик. Уни маълум жойга ўзим учун қайд этиб қўяман. Зеро, 
кўча-кўйда, сиз кутмаган ҳолатда келган яхши фикр ёзиш учун атайлаб ўтирганда келмаслиги мумкин. 
Агар уни қисқача қайд этиб қўйсангиз, кейинроқ кенгайтириб баён қилаверасиз. 
ИЛМИНИ ТУПРОҚҚА ОЛИБ КЕТАДИГАНЛАР 
Одам қанча илмли бўлмасин, билганини бошқаларга етказа олмаса – оғзаки ва ёзма нутқи равон, 
тушунарли бўлмаса, илми ўзида қолиб кетади, ундан кўпчилик фойдалана олмайди. 
ФИКРИЙ ҚОЛОҚЛИК 
Дуч келган одамга тақлид қилиб кетавериш одамнинг эътиқоди заифлиги, шахсий фикри 
йўқлигини билдиради. Ундай одамларни йўлдан уриш осон. Бундан чиқди, жамият тинчлигини 
таъминлаш учун фикрий қолоқликка ҳам қарши курашиш лозим. 
СЎЗ ВА АМАЛ БИРЛИГИ 

---

Сўзимиз билан амалимиз бир-бирига мувофиқ бўлса, жуда яхши! Сўзимиз амалимиздан бироз 
кўпайиб кетса, ҳечқиси йўқдир, балки. Лекин амалимиз бошқа, сўзимиз бошқа бўлса, сўзимизни 
эшитган одам бизни салоҳиятли, деб ўйласа-ю, амалимизни кўрганида тасаввури бутунлай ўзгариб 
кетса, яхши эмас.