Ózbekstan respublikasí

Normativ-huqıqıy hújjetler tusinigi hám olardıń túrleri.
Bilim insandı joqarı dárejege kóterip ǵana qoymastan, ol jasap atırǵan mámlekettide rawajlandıradı. Dúnya júzi tájriybesinde tek bilim arqalı ǵana kóplegen máselelerdi sheshiw múmkinligin kórsetedi. Bilimli insanlardıń qábileti hám jemisleri menen kóp mámleketler rawajlanbaqta. Sonıń ushın hár bir uzaqtı kózlegen mámleket óz puqaralarınıń bilimli bolıwına mápdar hám sol jolda háreket etedi. Al bul óz náwbetinde puqaralardıń bilimli bolıwına, bilimlendiriwdiń basqarıw sistemasınıń qanday jolǵa qoyılǵanlaǵı, oǵan qanday sharayatlar jaratıp bergenligi menen tásir etedi.
“Hár qanday nızam hújjetin qabıl etiwden tiykarǵı maqseti xalqımızdıń turmıs sharayatın jaqsılaw ekenligin hesh qaysımız umıtpawımız kerek. Bul processtegi tiykarǵı másele–nızam hújjetleriniń mazmun mánisin orınlawshılar hám xalıqqa óz waqtında jetkerip beriw, olardı ámelge asırıwdı qatań támiyinlewden ibarat” dep orınlı pikir bildirdi mámleket basshısı.
Álbette hámmemizdiń turmısımızdı normativ-huqıqıy hújjetler tártipke salıp turadı. Insan jámiyiette jasar eken onıń tártip qaǵıydalarına boysınıw, milliy qádiriyatlardı húrmet etiw menen qatnasıqta bolıw zárúr bolıp tabıladı.
Búgingi kúnde tálim-tárbiya tarawında xızmet kórsetip atırǵan pedagoglarda óz iskerliklerin normativ-huqıqıy hújjetler tiykarında shólkemlestiredi. Normativ-huqıqıy akt - bul Nızamǵa muwapıq qabıl etilgen, ulıwma májbúriy mámleketlik kórsetpeler sıpatında huqıqıy normalardı belgilewge, ózgertiwge yaki biykar etiwge qaratılǵan rásmiy hújjet bolıp tabıladı.
Ózbekstanda Oliy Majlistiń palataları, Ózbekstan Respublikasınıń Prezidenti, Ministrler Kabineti, mámleketlik komiteteler hám vedomstvolar, jergilikli mámleketlik hákimiyat uyımları normativ-huqıqıy hújjetler qabıl etiw huqıqına iye uyımlar yaki lawazımlı shaxslar bolıp esaplanadı.
Qaraqalpaqtan Respublikasında normativ-huqıqıy hújjetlerdi qabıl etiw huqıqına iye bolǵan uyımlar–bul Qaraqalpaqstan Respublikası Joqarǵı Keńesi, Ministrler Keńesi, ministrlikler, mámleketlik komitetler hám vedomstvolar, jergilikli mámleketlik hákimiyat uyımları bolıp tabıladı.