«Ўзбекистонда меҳнат унумдорлигини оширишни жадаллаштириш зарур» — Жаҳон банки иқтисодчиси

«Ўзбекистонда меҳнат унумдорлигини оширишни жадаллаштириш зарур» — Жаҳон банки иқтисодчиси
Жаҳон банки иқтисодчиси Эскендер Трушин Ўзбекистон иқтисодиётининг қайси тармоқлари жаҳон бозорида рақобатбардош экани ва қандай ёрдамга муҳтожлигини таҳлил қилди.
Lotinchada9 июл 2019, 11:30 Иқтисодиёт
Жаҳон банкининг катта иқтисодчиси Эскендер Трушин Тошкентда бизнес вакиллари билан учрашувда 2018 йилда Жаҳон банки томонидан тайёрланган «Ўзбекистонда иқтисодий ўсиш ва иш ўринларини яратиш» ҳисоботини тақдим этди. Ҳисоботда 2013−2017 йилларда йирик фирмалар, 2017 йилда кичик корхоналар ўртасида ўткизилган иккита сўровнома маълумотларидан фойдаланилган. Ҳисобот тақдимотининг асосий жиҳатлари билан қуйида танишишингиз мумкин.
Меҳнат унумдорлиги ортиши билан иш ҳақи ошади. Лекин ҳар доим эмас
Ўзбекистондаги (2018 йилда қўшма корхона ва қишлоқ хўжалигини ҳисобга олмаганда, ўртача 225 доллар) ва Иқтисодий ҳамкорлик ва тараққиёт ташкилоти (ИҲТТ) мамлакатларидаги (масалан, Полшада 1356 доллар, Литвада 948 доллар, Беларусда 422 доллар, Арманистонда 386 доллар) ўртача иш ҳақи тўғрисидаги маълумотлар билан бошлар экан, Эскендер Трушин мамлакатлар ўртасидаги меҳнат унумдорлигининг фарқи иш ҳақининг фарқини аниқлашини таъкидлаб ўтди.
РЕКЛАМА
"Газета.uz"да реклама
Кам ва юқори даромадли мамлакатларда аҳоли жон бошига тўғри келадиган ЯИМнинг фарқи мамлакатлар ўртасидаги меҳнат унумдорлиги тафовутини кўрсатади. Аҳоли жон бошига ЯИМни ошириш учун (Ўзбекистонда 2018 йилда номинал жиҳатдан 1532 доллар) меҳнат унумдорлигини ошириш ва иш ўринларини яратиш зарур.
2004−2011 йилларда ўртача реал иш ҳақининг жадал ўсиши (меҳнат унумдорлигининг ошишига кўра тез), эҳтимол, иш ўринларини яратиш ва аҳолини иш билан таъминлашга салбий таъсир кўрсатди, шу жумладан меҳнат ҳажми юқори бўлган соҳаларда, дея таҳмин қилади маърузачи.
Иш ўринлари ва уларнинг маҳсулдорлиги — бу икки кўрсаткич бир вақтнинг ўзида ўсиб бориши керак, қарама-қарши йўналишларда ўзгариш керак эмас, дея таъкидлади ЖБ мутахассиси.
Эскендер Трушин сўнгги 20 йил ичида қурилиш, кимё ва нефт-кимё саноати, савдо ва умумий овқатланиш, транспорт ва алоқа соҳаларида ушбу икки кўрсаткич бир вақтнинг ўзида (ва бу энг мақбул натижа) ўсиб келганлигини қайд этди.