Ўзбекистон республикасининг

171-модда. Апелляция инстанциясининг қарори

Апелляция шикоятини (протестини) кўриш натижалари бўйича қарор қабул қилиниб, у барча судьялар томонидан имзоланади. (ЎзР 30.08.2002 й. 405-II-сон Қонуни таҳриридаги қисм)

Қарорда қуйидагилар кўрсатилиши лозим:
1) қарорни қабул қилган хўжалик судининг номи, қарор қабул қилинган сана, ишнинг тартиб рақами, қарорни қабул қилган суд таркиби, суд мажлиси котиби, мажлисда иштирок этган шахсларнинг фамилиялари ва ваколатлари, биринчи инстанцияда ҳал қилув қарори қабул қилинган сана ва ҳал қилув қарорини қабул қилган судьяларнинг фамилиялари; (ЎзР 30.08.2002 й. Қонуни таҳриридаги банд)
2) ишда иштирок этувчи шахсларнинг номи, апелляция шикояти (протести) берган шахснинг номи; (ЎзР 30.08.2002 й. 405-II-сон Қонуни таҳриридаги банд)
3) қабул қилинган ҳал қилув қарори мазмунининг қисқача баёни;
4) ҳал қилув қарорининг қонунийлиги ва асослилигини текшириш масаласи қўйилишига сабаб бўлган асослар;
5) апелляция шикояти (протести) юзасидан билдирилган мулоҳазада баён қилинган важлар; (ЎзР 30.08.2002 й. 405-II-сон Қонуни таҳриридаги банд)
6) мажлисда иштирок этган шахсларнинг тушунтиришлари;
7) ишнинг хўжалик суди томонидан аниқланган ҳолатлари, хўжалик судининг шу ҳолатлар тўғрисидаги хулосаларига асос бўлган далиллар ҳамда хўжалик суди у ёки бу далилларни рад этишига ҳамда ишда иштирок этувчи шахслар асос қилиб келтирган қонун ҳужжатларини қўлламаслигига сабаб бўлган важлар, шунингдек суд қарор қабул қилишда амал қилган қонун ҳужжатлари;
8) биринчи инстанция судининг ҳал қилув қарорини бекор қилаётганда ёки ўзгартираётганда апелляция инстанцияси суди биринчи инстанция судининг хулосаларига қўшилмаганлигининг сабаблари;
9) апелляция шикоятини (протестини) кўриб чиқиш натижалари бўйича хулосалар; (ЎзР 30.08.2002 й. 405-II-сон Қонуни таҳриридаги банд)
10) суд харажатларининг тарафлар ўртасида тақсимланиши.
Қарор қабул қилинган вақтидан бошлаб қонуний кучга киради.
Қарор қабул қилинган кунидан эътиборан беш кунлик муддатда ишда иштирок этувчи шахсларга топширилганлиги маълум қилинадиган буюртма хат орқали юборилади ёки тилхат олиб топширилади.
Қарор устидан шикоят қилиш мумкин.