Ўзбекистон Республикасининг «Ҳуқуқбузарликлар профилактикаси тўғрисида»

ҲУҚУҚБУЗАРЛИКЛАРНИНГ ВИКТИМОЛОГИК ПРОФИЛАКТИКАСИ
43-модда. Ҳуқуқбузарликларнинг виктимологик профилактикаси тушунчаси
Ҳуқуқбузарликлар профилактикасини бевосита амалга оширувчи орган ёки муассасанинг муайян шахснинг ҳуқуқбузарликдан жабрланувчига айланиши хавфини камайтиришга қаратилган профилактика чора-тадбирларини қўллашга доир фаолияти ҳуқуқбузарликларнинг виктимологик профилактикасидир.

Ш А Р Ҳ

Ҳуқуқбузарликларнинг виктимологик профилактикаси ҳуқуқбузарликлар профилактикасини бевосита амалга оширувчи орган ва муассасалар томонидан фуқароларнинг ёки муайян шахсларнинг ҳуқуқбузарликлардан жабрланиш эҳтимолини камайтиришга йўналтирилган ҳуқуқбузарликларни содир этилишида жабрланувчиларнинг тутган ўрнини ҳамда жабрланишнинг сабаблари ва уларга имкон берган шарт-шароитларни аниқлаш, бартараф этиш, шунингдек тарғибот-ташвиқот ишларини ташкил этиш орқали жабрланиш хавфини туғдираётган омиллар ва ҳуқуқбузарликлар ҳақида маълумотлар бериш, бу борада огоҳликка, хушёрликка чақириш ҳамда хавфсизликни таъминлаш чора-тадбирларини амалга ошириш мақсадида олиб борилади.

Ҳуқуқбузарликларнинг виктимологик профилактикаси «Ҳуқуқбузарликлар профлактикаси тўғрисида»ги Қонун талаблари асосида умумий ва якка тартибда амалга оширилиши мумкин.
Ҳуқуқбузарликларнинг умумий тартибдаги виктимологик профилактикаси давлат ва жамиятга ўзининг кўп содир этилаётганлиги билан ёки ижтимоий ва моддий зарари билан хавф туғдираётган ҳуқуқбузарликлар ёхуд маълум бир тоифадаги шахсларнинг жабрланиш кўрсаткичининг тобора ошаётганлиги билан таҳдидлар кучайган ҳолларда маълум бир турдаги ҳуқуқбузарлик ҳамда жабрланиш эҳтимоли юқори бўлган маълум бир тоифадаги шахслар хусусиятидан келиб чиқиб, тарғибот-ташвиқот ёки бошқа турдаги профилактик чора-тадбирлар асосида фуқароларни огоҳликка, хушёрликка ва хавфсизликка чорлаш ва бунга эришиш мақсадида амалга оширилади.
Ҳуқуқбузарликларнинг якка тартибдаги виктимологик профилактикаси маълум бир ҳуқуқбузарликлар бўйича муайян шахснинг жабрланиш эҳтимоли юқорилигини аниқлаш асосида уни мавжуд хавфдан огоҳ қилиш, хушёрликка чақириш ва хавфсизлик чораларини кўришга қаратилган профилактик чора-тадбирларни ташкил этиш мақсадида амалга оширилади.