Ўзбекистон республикасининг оила кодекси

190-модда. Ҳомийликнинг тугаши
Ҳомийлик қуйидаги ҳолларда:
ҳомий ёки ҳомийликдаги шахс вафот этганда;
ҳомийликдаги шахс вояга етганда;
ҳомийликдаги шахс ота-онасига қайтарилганда;
ҳомийликдаги шахс никоҳга кирганда;
вояга етмаган шахс тўла муомалага лаёқатли деб эълон қилинганда (эмансипация);
фуқаронинг муомала лаёқатини чеклаш ҳақидаги суднинг ҳал қилув қарори бекор қилинганда;
ҳомийликдаги вояга етган шахснинг соғлиғи яхшиланганлиги туфайли у мустақил равишда ўз ҳуқуқларини амалга ошириш ва мажбуриятларини бажариш имкониятига эга бўлганда тугайди.
191-модда. Васий ёки ҳомий етказган мулкий зарарни тўлаш
Васийлик ва ҳомийлик органлари васий ёки ҳомийдан ўз зиммасига юклатилган мажбуриятларни инсофсизлик ёки эътиборсизлик билан бажариши натижасида етказилган мулкий зарарни тўлашини талаб қилишга мажбур, васийлик ва ҳомийлик тугатилганда эса, васийлик ва ҳомийликда бўлган муомалага лаёқатли шахс ҳам бундай талабни қўйишга ҳақли.
192-модда. Васийлик ва ҳомийлик органларининг қарори устидан шикоят қилиш
Васийлик ва ҳомийлик органларининг васий ёки ҳомий тайинлаш ҳамда васий ёхуд ҳомийни четлатиш ҳақида, шунингдек васийлик ва ҳомийликнинг бошқа барча масалалари юзасидан чиқарган қарорлари устидан манфаатдор шахслар судга шикоят қилишлари мумкин.
193-модда. Васий ва ҳомийнинг хатти-ҳаракатлари устидан шикоят қилиш
Васий ва ҳомийнинг хатти-ҳаракатлари устидан васийлик ёки ҳомийликдаги шахснинг ўзи, давлат муассасалари, жамоат бирлашмалари ва бошқа фуқаролар васийлик ёки ҳомийликдаги шахс яшаётган жойдаги тегишли васийлик ва ҳомийлик органига ёки судга шикоят қилишлари мумкин.
22-боб. Болаларни оилага тарбияга олиш (патронат)
194-модда. Оилага тарбияга бериладиган болалар (патронат)
Ота-она қарамоғидан маҳрум бўлган вояга етмаган болалар, шу жумладан тарбия ва даволаш муассасаларида, шунингдек аҳолини ижтимоий ҳимоялаш муассасаларидаги болалар оилага тарбияга берилади.
Болаларни оилага тарбияга олишни истаган шахс васийлик ва ҳомийлик органлари билан келишилган ҳолда болаларни олдиндан танлаб олади.
Болаларни оилага тарбияга бериш уларнинг хоҳишини ҳисобга олган ҳолда амалга оширилади. Ўн ёшга тўлган болаларни уларнинг розилиги билан оилага тарбияга бериш мумкин.
Болаларни оилага тарбияга бериш тартиби ва шартлари қонун ҳужжатлари билан белгиланади.