Ўзбекистон Республикаси Соғлиқни сақлаш вазирининг

4.7. 
Сийдик кислотали ва аммоний урат тошлари 
Сийдик кислотаси ва аммоний урат тошлари бўлган барча беморлар қайталаниш 
хавфи юқори гуруҳга киради [246]. Урат тошлари буйракдаги тошларнинг тахминан 10% 
ни ташкил қилади [260]. Улар гиперурикозурия ёки рНнинг паст даражаси билан боғлиқ. 
Гиперурикозурия овқатланиш хусусиятлари, ортиқча эндоген шаклланиш (ферментлар 
бузилиши), миелопролифератив касалликлар, ўсманинг лизис синдроми, дори 
препаратлари, подагра ёки катаболик моддалар алмашинуви туфайли юзага келиши 
мумкин [261]. рНнинг паст даражаси одатда аммоний экскрециясининг пасайиши 
(инсулин резистентлик ёки подагра), ортиқча эндоген шаклланиш (инсулин резистентлик, 
метаболик синдром ёки юклама туфайли лактоацидоз), овқат маҳсулотларида кислота 
миқдорининг ортиши (кўп миқдордаги ҳайвон оқсиллари) ёки асосларнинг сезиларли 
даражада йўқотилиши (диарея) билан боғлиқ [261]. 
Аммоний урат тошлари жуда кам учрайди, бу барча турдаги тошларнинг 1 фоиздан 
камини ташкил қилади. Улар СЙИ, мальабсорбция (ичакнинг яллиғланиш касаллиги, 
илеостома ёки тез-тез сурги дорилардан фойдаланиш), калий етишмовчилиги, 
гипокалемия ва тўйиб овқатланмаслик билан боғлиқ. 
4.7.1. Ташхислаш 
Иловаларда сийдик кислотали ва аммоний урат тошларини ташхислаш ва даволаш 
алгоритми кўрсатилган. Креатинин, калий ва сийдик кислотаси учун қон таҳлилини 
ўтказиш керак. Сийдикни таҳлили сийдик миқдори, рН қиймати ва солиштирма оғирлиги, 
шунингдек сийдик кислотаси миқдорини аниқлашни ўз ичига олади. Аммоний урат 
тошлари мавжуд бўлса, сийдикни стериллик учун экиш амалга оширилади. 
4.7.2. Натижаларни талқин қилиш 
Сийдик кислотаси ва аммоний уратдан ташкил топган тошлар ҳосил бўлиши 
умуман турли биокимёвий шароитларда содир бўлади. Сийдикдаги рНнинг доимий паст 
қиймати (< 5,8) сийдик кислотасининг кристалланишига олиб келади. 
Гиперурикозурия сийдик кислотасининг экскрецияси катталар учун > 4 ммоль/сут, 
болаларда > 0,12 ммоль/кг/сут даражада белгиланади. Беморларда гиперурикемия қайд 
этилиши мумкин, аммо тош ҳосил бўлиши билан боғлиқлиги тўғрисида ишончли 
далиллар мавжуд эмас. 
Гиперурикозурияда кальций оксалат тошларининг ҳосил бўлишини сийдик 
кислотаси тошларидан сийдикнинг кислоталик даражасига кўра фарқлаш мумкин. 
Кальций оксалат тошлари учун сийдик рН қиймати одатда 5,5дан баланд, сийдик 
кислотаси тошлари учун эса 5,5дан кичик кўрсаткични ташкил қилади. Камдан кам 
ҳолларда сийдик кислотаси тошлари гиперурикозурия мавжуд бўлмаган ҳолатларда ҳосил 
бўлади [262, 263]. Аммоний уратнинг кристалланиши сийдик рН > 6,5 даражасида, сийдик 
кислотасининг юқори даражасида, аммоний катион вазифасини бажарганда содир бўлади 
[264-266].