Ўзбекистон республикаси олий ва ўрта махсус таълим вазирлиги тошкент молия институти “молиявий менежмент” факультети

КУРС ИШИ – ТАЛАБА МУСТАҚИЛ ТАЪЛИМИДА ФАННИ ПУХТА ЎРГАНИШ АСОСИ


Курс ишини бажариш жараёнида қўйиладиган асосий талаблар
Курс ишини муваффақиятли бажариш учун талабалар фан тўғрисида яхши тасаввурга эга бўлишлари зарур. Бунда, асосан курс ишининг ғоявий, назарий даражасига, шунингдек, унинг ёзилиши ва расмийлаштириш тартибига эътибор беришлари керак. Курс ишининг мавзусини танлашда талабаларга кафедра томонидан тасдиқланган курс ишлари рўйхатида кўрсатилган мавзуларни эркин танлаш ҳуқуқи берилади.
Талаба ўзи танлаган мавзуси моҳияти ва мазмунини ёритишда мустақил ҳолда, иқтисодчи олимларнинг асарларидан кенг фойдаланиши, уларнинг асосий ғояларига алоҳида эътибор бериши керак. Бу ерда талаба таҳлил қилаётган назарий фикрларни аниқ мисол ва маълумотлар билан асосласа максадга мувофиқ бўлади.
Курс ишини бажаришнинг дастлабки босқичи бу курс иши мавзулари мажмуидан мавзуни танлаганидан сўнг, унга тегишли манбаларни қараб чиқиш, дарслик ва ўқув қўлланма ҳарактеридаги адабиётлардан фойдаланиши ишнинг сифатини оширади. Талаба буни ўқув йили давомида амалга ошириши керак. Курс ишини ёзиш борасида тавсия этилган йўриқномага риоя қилиш мавзу мазмунини тўғри таърифлаб бериш, унинг моҳиятидан четга чиқмаслик имконини беради.
Курс ишини ёзиш жараёнида талаба тавсия этилган адабиёт ва материалларни тўғридан-тўғри кўчириб олиши мумкин эмас. Балки улардан илмий ва ижодий ёндашув асосида фойдаланиш зарур. Ишни мустақил бажариш энг муҳим талаблардан бири бўлиб ҳисобланади, мавзу устида ҳалол, ижодий иш олиб бориш лозим. Курс ишини бажарганда талабалар мавзусини ўзлари амалиёт ўтаган корхоналар, ташкилотлар, таълим муассасалари амалий фаолияти билан боғлиқ таҳлил қилса яхши самара беради ва унинг сифати ошади.
Талаба курс иши мавзусида кўрсатилган адабиётлар рўйхати билан чекланмасдан рус ва бошқа хорижий тиллардаги адабиёт ва материалларни мустақил равишда кенг фойдаланиши зарур.
Курс ишининг ҳажми қўл ёзма шаклида 35-40 бет атрофида, компьютерда терилганида эса 20-25 бетдан ошмаслиги зарур.