Ўзбекистон республикаси олий ва ўрта махсус таълим вазирлиги наманган муҳандислик-қурилиш институти

МАЛАКАВИЙ АМАЛИЁТ МОБАЙНИДА ТАЛАБА АМАЛ ҚИЛИШИ ЛОЗИМ БЎЛГАН ҚОИДАЛАР

Амалиётга ўқишнинг назарий курсини муваффақиятли тугаллаган талабалар юборилади. Унга асос бўлиб талабани амалиётни ўтиш учун қабул қилишга розилигини тасдиклайдиган корхоналар, ташкилотлар ва бирлашмаларнинг расмий хатлари ва улар билан тузилган шартномалар хизмат қилади.

Амалиётни бошлашдан олдин кафедрада талабалар билан мажлис ўтказилади. Унда амалиётнинг мақсад ва вазифалари, амалиётни ўтиш муддати ва тартиби, ҳисобот ва битирув-малакавий ишига қўйиладиган талаблар тўлиқ тушунтирилади, шунингдек талабаларга амалиёт дастурлари ва кундаликлари тарқатилади.
Ҳар бир талабанинг амалиётига икки киши раҳбарлик қилиб, бири кафедра томонидан тайинланадиган профессор-ўқитувчи бўлса, иккинчиси амалиёт ўтиладиган корхона раҳбари томонидан тайинланадиган мутахассис бўлади. Иккала раҳбар ҳам амалиёт якунида ёзиб топшириладиган ҳисоботга ёзма хулоса берадилар.
Амалиётни ўтишни бошлашдан олдин талаба амалиётнинг мақсад ва вазифаларидан келиб чиққан ҳолда амалий иш малакасини ҳосил қилишни, шунингдек малакавий амалиётни муваффақиятли бажаришни назарда тутиши керак. Бундан келиб чиққан ҳолда талаба қуйидаги вазифаларни бажариши лозим:
-амалиётнинг бошланиш ва якунланиш муддатларига амал қилиш;
-амалиёт базасида ўрнатилган ички тартиб қоидаларга амал қилиш;
-амалиёт давомида малакавий амалиёт хисоботини тайёрлаш учун керак бўлган барча маълумотларни йиғиш ва қайта ишлаш;
-амалиёт давомида кафедра томонидан берилган амалиёт кундалигини тўғри, сифатли ва тўлиқ юритиш;
-амалиёт ҳисоботини кафедрага ёзма хулоса билан (ҳисоботга институтдан тайинланган рахбар ва амалиёт базасидан тайинланган раҳбарнинг хулосалари) ўз вақтида топшириш.
Талаба томонидан ушбу вазифаларнинг бажарилмаслиги кафедрада талабани курсдан курсга ўтказишга ва стипендия тайинлашга рухсат бермаслик тўғрисидаги масалани ўртага қўйишга асос бўлади.

4. 
   МАЛАКАВИЙ АМАЛИЁТ НАТИЖАЛАРИНИ ЯКУНЛАШ ВА ҲИСОБОТИНИ ҲИМОЯ ҚИЛИШ
   

Амалиёт ҳисоботи барча иловалар билан биргаликда институтнинг “Менежмент” кафедрасига амалиётдан қайтганда сўнг бир кун давомида топширилади. Корхона ва кафедра томонидан тайинланган раҳбарлар ҳисоботни текширишиб, унга ижобий баҳо (хулоса) берганларидан сўнг ҳисобот ҳимояга тавсия этилади. Талаба амалиётда бажарган хисоботини махсус комиссия олдида ҳимоя қилади. Комиссия кафедра томонидан ёки амалиёт ўтилган корхонадан белгиланади. Ҳисобот ҳимоя қилинганидан сўнг ҳимоя натижаси талабанинг рейтинг дафтарчасига қўйилади.