Ўзбекистон республикаси олий ва ўрта махсус таълим вазирлиги наманган мухандислик технология институти Сотволди Турсунов

Тупроқка талаби. Кузги буғдой бошқа ғалла экинларига нисбатан тупроққа талабчанлиги юқори. Кузги буғдой учун тупроқ унумдор, структурали, азот, фосфор, калий ва бошқа озуқа моддаларга бой бўлиши лозим. Унинг меъёрида ўсиш ва ривожланиши учун тупроқ муҳити нейтрал (бетараф рН-6-7,5) бўлиши керак.
Ўзбекистонда энг кенг тарқалган бўз тупроқлар, ўтлоқи бўз ва ўтлоқи, бегона ўтлардан тоза бўлса, кузги буғдой учун энг қулай ҳисобланади. Бу тупроқлар чириндига, азотга камбағал бўлса ҳам уларда осон биологик жараёнлар жуда жадал ўтади ва ўсимликлар ўзлаштириши осон бўлган маъданли моддаларнинг ҳаракатчан формаларини ҳосил қилади. Суғориладиган ерларда кенг тарқалган ўтлоқи, бўз-тупроқ, ўтлоқи-ботқоқ тупроқлар ҳам кузги буғдойдан мўл ҳосил етиштириш учун жуда қулай. Буғдой шўрланган тупроқларда яхши ўсмайди. Эрозияга учраб тупроғи ювилган нишаб ерлар, қумли тупроқлар буғдой экиш учун қулай эмас.
Ёруғликка талаби. Ёруғлик ўсимлик хаётининг энг муҳим омилларидан биридир. Ёруғлик кунининг узунлиги, ёруғликнинг интенсивлиги ва унинг спектр таркиби, фотосинтез интенсивлиги, органик моддаларнинг тўпланишига, ўсимликнинг ўсишига, ривожланишига, айрим органларнинг шаклланишига таъсир қилади. Ёруғлик барглар тупроқ юзасидан пайдо бўлмасдан ўсимликка таъсир кўрсатади.
Кузги ўсув даврининг бошланишида ёруғликнинг етишмаслиги ўсимликнинг ўсиш тезлигига биринчи навбатда барглар ва тупланиш бўғимининг ҳосил бўлишига таъсир қилади. Серқуёш об-ҳаво униб чиқиш фазасида, айниқса иккинчи учинчи баргларнинг ўсиш даврида, қулай ҳарорат, сув, озиқа режими билан уйғунлашган ҳолда йирик барглар ҳосил бўлишига ва тупланиш бўғинининг чуқур жойлашишига ёрдамлашади.
Кузги буғдой узун кун ўсимлиги. Баҳорда, ўсиш даврида 13-14 соатдан кам бўлмаган ёруғлик куни ўсимликнинг кўп миқдорда пластик моддалар тўплаши, биомассасининг тўпланиши ва ёруғлик стадиясини тез ўтишига ёрдамлашади.
Қуёшли об-ҳаво шароитида найчалаш фазасининг бошланишида қисқа, аммо мустахкам пастки бўғин оралиғи шаклланади ва ўсимлик ётиб колишга чидамли бўлади.
Серқуёш, булутсиз, очик об-ҳаво, етарли намлик доннинг шаклланиши, пишиб етилишида, юқори ҳосил олишда муҳим омиллар ҳисобланади.