Ўзбекистон республикаси олий ва ўрта махсус таълим вазирлиги абу райҳон беруний номидаги тошкент давлат техника университети

2.10 Иккиламчи майдалаш
Кон жинсларини иккиламчи майдалаш деганда ногабарит бўлакларни портлаш таъсирида, термик, электромеханик, механик ва бошқа усулларда қайта майдалаш тушунилади. Ногабаритларни портлатиш таъсирида майдалашда шпурли ва устқўйма зарядлардан фойдаланилади. Устқўйма заряд усули кичик ҳажмдаги иккиламчи майдалашда қўлланилади.
Қалинлиги h₃=4-5 см бўлган устқўйма заряд ногабаритнинг устига қўйилиб унинг усти қалинлиги h_{з аб}≥ h_з бўлган глина ёки қум тиқин билан қопланади.(2.9-расм,а). Устқўйма заряд самарадорлигини ошириш учун кумулатив бўшлиқли кучли ПМ зарядидан фойдаланилади (2.9-расм,б). Бунда ПМ сарфини 5-7 марта камайтиришга эришилади.

2.9 - расм. Ногабаритларни майдалашда зарядларни жойлаштириш схемалари: а-оддий устқўйма заряд конструкцияси; б-куммулятив устқўйма заряди; в-гидравлик тиқинли шпур заряди; 1-ногабарит; 2-ПМ заряди; 3-қум ёки глина қатлами; 4-детонатор; 5-детонациялаш шнури; 6-оралиқ детанатори; 7-сув.

Шпурли зарядлар қўлланилганда шпурларнинг диаметри 25-60 мм, чуқурлиги эса h_ш = (0,25÷ 0,5) h_н ташкил қилади.( h_н-ногабарит қалинлиги). ПМ солиштирма сарфи 0,1÷ 0,3 кг/ м³ бўлиши мумкин. Шпурларни бурғилаш қўл ёки колонкали перфораторлар ёрдамида бажарилади.

ПМ сарфи ва жинс бўлакларининг учиб кетиш масофасини қисқартириш мақсадида шпурлар тубига юқори бризантликка эга ПМ ларнинг кичик (одатдаги зарядларга нисбатан 8-12 марта кичик) зарядлари жойлаштирилади ва шпурнинг қолган қисми суюқлиқ билан тўлдирилади, яъни гидротиқинланади (2.9-расм,в). Шпурдаги суюқликнинг мумкин бўлган узунлиги эса 30-35 см ни ташкил қилади.
Механик усулда иккиламчи майдалаш массаси 1,5-5 т бўлган кран ёки экскаваторнинг кўтариш симарқонига осилган юкнинг оғирлик кучи таъсирида ногабаритни майдалашга асосланган. Юк шар ёки цилиндр шаклида бўлиши мумкин. Иккиламчи майдалаш самарадорлиги махсус тош майдаловчи машина ёрдамида йўналтирилган зарба бериш натижасида юқори бўлади.
Ногабаритларни термик ва электротермик усулида иккиламчи майдалаш тош бўлакларини турли иссиқлик манбаларидан (реактив горелкалар, электр ёйи ва бошқалар) фойдаланиб қиздиришга асосланади. Карьерларда ногабарит бўлакларни иккиламчи майдалашда саноат частотасига эга бўлган паст кучланишли электр токидан фойдаланилади.