Ўзбекистон республикаси олий ўрта махсус таълим вазирлиги гулистон давлат университети

1.2. Бухгалтерия ҳисобини уйғунлаштириш ва халқаро стандартлаштиришнинг зарурлиги ва шарт-шароитлари
ХХ асрнинг иккинчи ярми халқаро ихтисослашув ва меҳнат тақсимоти, мамлакатлар ва қитъалар ўртасида ҳамкорлик ва ишлаб чиқариш уйғунлиги, миллий чегаралардан ошувчи жаҳон бозорини яратиш жараёнини мустаҳкамлаш билан тавсифланади.
Иқтисодий муносабатларни байналминаллашувининг ўзига хос хусусияти аралаш капиталга эга бўлган, чет эл инвестициялари ва кредитларини жалб қилувчи корхоналарнинг пайдо бўлишини ифода этади. Бу жараёнларни амалга оширишда корхоналар фаолияти тўғрисида ишончли ва тушунарли молиявий ахборот олиш муҳим аҳамият касб этади. Бундай ахборотни олиш учун хўжалик юритувчи субъект ҳақидаги молиявий ахборотнинг асосий қисмини таъминловчи бухгалтерия ҳисобини уйғунлаштириш ва халқаро стандартлаштириш зарур.
Бухгалтерия ҳисоби муаммоларини халқаро миқёсда ҳал қилиш учун, бир қатор халқаро ҳукуматлараро ташкилотлар (ХҲТ) ташкил этилди: БМТ трансмиллий корпорациялар бўйича комиссияси; БМТ халқаро бухгалтерия стандартлари бўйича экспертлар ҳукуматлараро ишчи гуруҳи; Европа иқтисодий ҳамжамияти; Иқтисодий ҳамкорлик ва ривожланиш ташкилоти ва халқаро профессионал бухгалтерлар ташкилотлари.
ХҲТ асосан халқаро нормалар, қоидалар ва стандартларни ишлаб чиқиш орқали иқтисодиёт, молия, бухгалтерия ҳисоби соҳасидаги муносабатларни меъёрлаштириш билан шуғулланади.
Халқаро профессионал ташкилотлар ўз ичига олади:

• 
  Молиявий ҳисоботнинг халқаро стандартлари Кенгаши (МҲХСК);
  
• 
  Халқаро бухгалтерлар Федерацияси;
  
• 
  Осиё ва Тинч океани бухгалтерлари конференцияси;
  
• 
  Европа бухгалтерлар-экспертлар федерацияси ва бошқалар.
  

Молиявий ҳисоботнинг халқаро стандартлари (IFRS), умумқабул қилинган бухгалтерия ҳисоби тамойиллари (ГААП) ва Европа иқтисодий ҳамжамиятининг йўриқномалари бухгалтерия ҳисобини уйғунлаштириш ва халқаро стандартлаштириш жараёнига энг катта таъсир кўрсатди.