Ўзбекистон республикаси мудофаа вазирлиги

Таянч сўзлар: Йўлак, макет, техника машқ, темир йўл, маскировка, кўтарилиш, кечув жойи, тўсиқ.
Назорат учун саволлар:
1. Чекланган йўлаклардан ўтиш техникаси машқини бажариш тартиби.
2. Тунда ҳайдашга ўргатиш машқини бажариш тартиби.
3.Машқни бажаришнинг баҳолаш кўрсаткичлари.
4. Машқни бажаришда хавфсизлик чоралари.
Фойдаланилган адабиётлар:
1. Зирҳли транспортёр БТР-80 техник тавсифномаси ва фойдаланиш бўйича йўриқнома, 1-қисм Тошкент 2010 й.
2. Қуруқликдаги қўшинлар жанговар машиналари ҳайдаш курси, М.Ҳарбий нашриёт 1986 й.
17-Модул: Кўтарилиш, пастликка тушиш ва эгри тепаликларда тўсиқлар ва ўтиш чекланган жойлардан ўтиш техникаси


17.1. Машиналарни темир йўл платформасига юклаш қоидалари. Ўзига хос тўсиқлар: танкка қарши ҳандақ, эскарп


Машиналарни темир йўл платформасига юклаш

Машиналарни темир йўл транспортига юклаш ҳарбий эшелон бошлиғи (катта командир) буйруғи асосида амалга оширилади. Ҳужжатларни расмийлаштириш юклаш билан биргаликда амалга оширилади ва қоровул бошлиғи томонидан транспортга юкланган техника қабул қилиб олинади. Техникаларни транспортга юклашни амалга ошириш учун жавобгар бўлинма командири ҳисобланади. Техникаларни юклаш уларни туширишни кетма – кетлигини ҳисобга олган ҳолда юкланади. Ёқилғи мойлаш маҳсулотлари техникалардан алоҳида қилиб юкланади.

Оғирлиги 10 тоннагача бўлган колёсли техникани платформаларга чиқаришда ва ҳаракатлантиришда оралиқ темир кўприкчалар қўйилмасдан ҳаракатланишига рухсат этилади. Платформага юклатилган техникаларни қотириш ва маҳкамлаш темир йўл транспортида техникаларни ташишни амалга ошириш техник талаблари асосида амалга оширилиши лозим.
Техника транспортга юклатилгач, шахсий таркиб қуйидаги вазифаларни бажаришга киришади:
- техникани бўйлама ва ёнлама силжишини олдини олишга қаратилган маҳкамлаш ишларини амалга ошириши;
- тўхтаб туриш тормозларини қўшиш (танкларда тормозлар ва тарқатмани қўшиш дастаги пломбаланади);
- қўшимча воситаларнинг маҳкамланганлигини текшириш;
- минора, қобиқ ва бошқа габарити чиқиб турувчи қурол аслаҳаларнинг сақлагичга қўйилганлиги текширилади;
- барча техника ойналари кўтарилиб эшик ва люклар муҳрланади;
- совуқ ҳаво шароитида совутиш тизимидан сув тўкилади;
- платформа ён томонлари бортлари кўтарилади (платформадан техника габарити чиқиб турадиган бўлса бундан мустасно);
- техникани ниқоблаш ишларини амалга оширади.
Барча юклаш билан боғлиқ ишларни экипаж аъзолари амалга оширишади. Бажарадиган ишлар ҳажми катта бўлган тақдирда, қўшимча равишда шахсий таркиб ажратилади.
Юклаш ишлари тугатилгандан сўнг ҳужжатлар расмийлаштирилиб техника қоровул бошлиғига топширилади.