Ўзбекистон Республикаси Конституциясига ўзгартиришлар киритиш учун таклиф

Ўзбекистон Республикаси Конституциясига ўзгартиришлар киритиш учун таклиф


Ўзбекистон Президенти Шавкат Мирзиёев Ўзбекистон халқини Конституция қабул қилинганининг 29 йиллиги билан табрик нутқида Конституцияга ўзгартиришлар киритиш бўйича берган таклифлари орасида қуйидаги банд ҳам бор эди:
“Бош қомусда оила институтини ривожлантириш, эзгу инсоний қадриятларни келгуси авлодларга безавол етказиш, миллатлараро тотувликни янада мустаҳкамлаш бўйича конституциявий асосларни белгилаш” зарурати.


Ўзбекистон Республикаси Конституциясининг 64- моддасида қуйидагилар белгиланган:
64-модда.
Ота-оналар ўз фарзандларини вояга етгунларига қадар боқиш ва тарбиялашга мажбурдирлар.
Давлат ва жамият етим болаларни ва ота-оналарининг васийлигидан маҳрум бўлган болаларни боқиш, тарбиялаш ва ўқитишни таъминлайди, болаларга бағишланган хайрия фаолиятларни рағбатлантиради.


Ота-оналарнинг болалар таълими учун масъулиятини ошириш учун “Ота-оналар ўз фарзандларини вояга етгунларига қадар боқиш ва тарбиялашга мажбурдирлар” қисмини “Ота-оналар ўз фарзандларини вояга етгунларига қадар боқишга, тарбиялашга ва уларнинг мажбурий таълим олишларини таъминлашга мажбурдирлар”, – деб ўзгартириш мақсадга мувофиқдир!
Қатор мамлакатлар конституцияларида болаларнинг таълим олишларини таъминлаш мажбурияти бевосита ота-оналар ва васийлар зиммасига юклатилиши белгилаб қўйилган. Масалан, Япония конституциясида бу масала қуйидагича акс этган:
Япония конституцияси, 26 – модда.
Ҳамма қонун ҳужжатларида белгиланган тартибда ўз қобилиятига яраша таълим олиш ҳуқуқига эга. Ҳар бир киши ўз қарамоғидаги болаларнинг тугалланган мажбурий таълим олишини таъминлаши шарт. Мажбурий таълим бепул амалга оширилади.
Бу ўзгариш бугунги кундаги айрим ота-оналарнинг ўз фарзандлари таълим олишини таъминлашдаги бепарволигининг олдини олган бўлар эди. Шунингдек, васий этиб тайинланган шахсларнинг масъулиятини оширишга ёрдам беради.