Ўзбекистон республикаси қишлоқ ХЎжалиги вазирлиги

“темир дафтар”га киритилган эҳтиёжманд ва ижтимоий ҳимояга муҳтож 400 мингдан ортиқ оилалардаги 1,7 миллион аъзоларининг ҳар бирига 220 минг сўмдан бир марталик моддий ёрдам пули берилди. Ушбу мақсад учун республика бюджетидан 380 миллиард сўм ажратилди. Бошқача қилиб айтганда, ўртача 5 кишилик оилага 1,1 миллион сўмлик моддий ёрдам пули ажратилиб, ҳисоб-китобларга кўра ҳаёт учун энг зарур бўлган бирламчи озиқ-овқат маҳсулотлари тўпламини харид қилиш имконияти яратилди.
2020 йилнинг якунига қадар 14 ёшгача болалари бўлган эҳтиёжманд нафақа олувчи оилаларнинг амалдаги сони 2 баробарга оширилиб, 700 мингтагача етказилди. Бола 2 ёшга тўлгунга қадар бола парвариши бўйича нафақа олувчи эҳтиёжманд оилаларнинг амалдаги сони 330 мингдан 400 мингтага оширилди. Моддий ёрдам олувчи кам таъминланган оилаларнинг амалдаги сони 89 мингдан 100 мингтага етказилди.
Шунингдек, тўлаш муддати 2020 йилнинг июль-сентябрь ойларида тугайдиган болалари бўлган оилаларга ва бола парвариши билан шуғулланадиган оналарга нафақа тўлаш навбатдаги 6 ой муддатга (бола тегишлича 2 ёш ва 14 ёшдан ошмаган ҳолатда) давом эттирилди.
2020 йилнинг сентябрь ойида аҳолининг қуйидаги қатламлари, яъни моддий ёрдам ва кўмакка муҳтож оилаларнинг рўйхатларига (“темир дафтар”) киритилган оилаларнинг 16 ёшга тўлмаган болаларига, боқувчисини йўқотганлик пенсияси ёки нафақасини олувчи оилаларнинг 16 ёшга тўлмаган болаларига, ногиронлиги бўлган 16 ёшга тўлмаган болаларга 500 минг сўм миқдорда бир марталик моддий ёрдам кўрсатилди.
Шунингдек, чет элда вақтинча ишлаш учун кетган ватандошларимиз қайтарилиб, давлат томонидан 14 кунлик карантинга олинди. Мазкур карантин давридаги ҳаражатлар давлат бюджети ҳисобидан қопланди.
Бир сўз билан айтганда, Муҳтарам Юртбошимиз бошчилигида амалга оширилаётган мазкур ислоҳотлар фуқароларимизнинг турмуш тарзини яхшилаш, халқимизнинг давлатимизга бўлган ишончини янада ошишига хизмат қилиб, инсон ҳуқуқларини таъминлаш бўйича мамлакатимизнинг халқаро миқёсда обрў-эътиборини ошишга хизмат қилмоқда.