Ўзбекистон республикаси ички ишлар вазирлиги академияси дастлабки тергов ва криминалистика кафедраси тергов фаолияти мутаҳасислиги

Енгил автомашиналар кузовининг тузилиши.

Енгил автомашиналарнинг кузовлари қуйидаги асосий қисмлардан ташкил топган: олдинги бампер; двигател капоти; ҳайдовчи ва йўловчи ўриндиқлари; юкхонанинг қопқоғи; эшиклар; қанотлар; орқа бампер; олд чироқлар; бурилиш чироқлари, туманга қарши чироқлар; радиаторга ҳаво кириши учун қоплама; орқа чироқлар; орқани кўриш ён ойналари.
Ҳаракатланаётган транспорт воситаси иштирокида содир бўлган ҳодиса оқибатида моддий зарар кўрилса, одамлар ҳаётдан кўз юмсалар ва турли даражадаги жароҳат олсалар, бундай ҳодисаларга йўл-транспорт ҳодисаси дейилади.
Йўл-транспорт ҳодисаларининг қуйидаги турлари мавжуд:
1) тўқнашув. Ҳаракатланаётган транспорт воситаларининг ўзаро бирбири ёки ҳаракатланаётган темир йўл эшелони билан тўқнашиб кетиш ҳодисасига тўқнашув деб аталади;
2) ағдарилиш. Ҳаракатланаётган транспорт воситаси ўзининг мустаҳкам ҳаракатланишини йўқотиб, ағнаб кетиши ҳодисасига ағдарилиш дейилади. Бундай турдаги йўл-транспорт ҳодисасига транспорт воситаларининг тўқнашуви натижасидаги ағдарилиш ва қўзғалмас обьектни босиб кетиш натижасидаги ағдарилиш кирмайди;
3) тўхтаб турган транспорт воситасини уриш. Ҳаракатланаётган транспорт воситасининг тўхтаб турган транспорт воситасига ёки тиркамага (притсепга) урилиши ҳодисасига, тўхтаб турган транспорт воситасини уриш деб аталади;
4) қўзғалмас обьектларга транспорт воситасининг урилиши. Ҳаракатланаётган транспорт воситасининг қўзғалмас обьектларга
(йўлдаги белгилар, дарахтлар, электр симёғочлари, деворлар ва бошқа шунга ўхшашларга) урилиш ҳодисасига, қўзғалмас обьектларга транспорт воситасининг урилиши дейилади;
5) пиёдаларни уриш. Ҳаракатланаётган транспорт воситасининг одамга урилиши ёки одамнинг ҳаракатланаётган транспорт воситасига урилиши ҳодисасига пиёдаларни уриш дейилади. Бундай ҳодисаларга транспорт воситасининг тиркамасидаги юкларнинг пиёдаларга урилиши ҳам киради;