Ўзбекистон республикаси энергетика ва электрлаштириш вазирлиги электр ускуналарини

17.3. НАВБАТЧИСИЗ КУЧАЙТИРГИЧ ПУНКТЛАРИ АППАРАТЛАРИ
17.3.1. Навбатчисиз кучайтиргич пунктларидаги ҳамма ишлар таркибида IV группага эга бўлган ишбошчи ва аъзоси III группага эга бўлган бригада томонидан амалга оширилиши мумкин.
17.3.2. Доимий шамоллатиш қурилмалари бўлмаган навбатчисиз кучайтиргич пунктларининг хоналарида иш бажарилганда, улар иш бошлашдан аввал ва ишлаш давомида шамоллатилиши зарур. Иш жараёнида хона эшиги ҳамма вақт очиқ ҳолда бўлиши шарт.
Доимий шамоллатиш қурилмалари бўлган навбатчисиз кучайтиргич пунктларидаги ҳамма шамоллатиш каналлари иш жараёнида очиқ ҳолда бўлиши керак.
17.3.3. Узоқдан бошқариладиган манба аппаратларини синашдан олдин барча навбатчисиз кучайтиргич пунктлар ва уларни манба билан уловчи навбатчиси бўлган кучайтиргич пунктлар орасида телефон алоқаси ташкил қилиниши зарур.
17.3.4. Узоқдан бошқариладиган манба аппаратларидан айрим платаларини олиш иш раҳбарининг рухсати билан ушбу аппаратдан кучланиш олингандан кейингина амалга оширилиши зарур. Кучланиш остида бўлган аппаратларни таъмирлаш ман этилади.
17.4. ҲАВО АЛОҚА ТАРМОҚЛАРИ
17.4.1. Электрлаштирилган темир йўл, трамвай ва троллейбусларни контакт электр тармоқлари билан кесишган жойлардаги ҳаво алоқа тармоқлари симларини таъмирлаш ва янгисини тортиш, тузатиш иш бажариш лойиҳасига асосан, контакт электр тармоқлари бўлими вакили иштирокида, ушбу тармоқни ўчириб ва ерга улангандан кейингина бажарилиши зарур.
17.4.2. Аҳоли яшайдиган мавзе кўчаларидаги ҳаво электр узатиш тармоқлари устидан алоқа тармоқларини тортиш жараёнида ўтиб бораётган аҳоли ва транспортни огоҳлантириб туриш учун қўлида байроқчаси бўлган сигнал берувчилар қўйилиши шарт.
17.4.3. Ҳаво электр узатиш тармоқлари остидан кесиб ўтаётган ҳаво алоқа тармоқлари симларини тортиш ва созлаш жараёнида ушбу Қоиданинг 3.2.9., 14.3.4. бандлари талабларига риоя қилиш зарур.
17.4.4. Иш бошлашдан олдин ҳаво алоқа тармоқларининг симлари билан ер ўртасида 42-Вольтдан юқори бўлган кучланиш йўқлигини текшириш керак.
Ҳаво алоқа тармоқларининг симларида 42-Вольт-дан юқори кучланиш борлиги аниқланса, ушбу кучланишни пайдо бўлиш сабаблари топилмагунча ва уни 42-Вольтгача пасайтириш чоралари кўрилмагунча иш бошлаш ман этилади.
17.4.5. Кучланиш таъсири остида бўлган ҳаво алоқа тармоқларида иш бажариш жараёнида ушбу Қоиданинг кучланиш таъсири остида бўлган ҳаво электр узатиш тармоқларида ишлашга тааллуқли 14.3.-бўлим талабларига риоя қилиш зарур.
17.4.6. Кучланиш таъсири остида бўлган ҳаво алоқа тармоқлари симларини ерга улаш дренаж ғалтакчаси орқали кўчма ерга улаш ускунасини ўрнатишда ишлатиладиган штанга ёрдамида бажарилиши керак.
17.4.7. Кучланиш таъсири остида бўлган ҳаво алоқа тармоқларига тортилаётган ҳамда осилиши керак бўлган сим бошида ва бевосита иш жойида ерга уланиши шарт.
Ерда ётган сим устунда маҳкамланган симларга ва кейинги участка учун тарқатилган симга тегмаслиги зарур.
Устунларга осилган симларни таранглигини созлаш ва уни маҳкамлаш ишлари бажарилгандан кейингина ушбу сим олдинги участка симларига уланиши зарур. Айрим участка симларини бир-бирига улашдан олдин, симларга ҳар икки томондан кўчма ерга улагич ўрнатиш зарур.