Ўзбекистон республикаси адлия вазирлиги ўзбекистон республикаси олий суди

1-боб. Умумий қоидалар
(1-бобнинг номи Ўзбекистон Республикаси Адлия вазирлигининг 2020 йил 28 ноябрдаги 5-сон, Олий судининг 2020 йил 25 ноябрдаги 667-сон, Бош прокуратурасининг 2020 йил 23 ноябрдаги кқ-63-сон, Молия вазирлигининг 2020 йил 1 декабрдаги 54-сон ҳамда Олий ва ўрта-махсус таълим вазирлигининг 2020 йил 30 ноябрдаги 12-2020-сонли қарори (рўйхат рақами 2548-2, 04.12.2020) таҳририда — Қонун ҳужжатлари маълумотлари миллий базаси, 04.12.2020 й., 10/20/2548-2/1602-сон)
Олдинги таҳрирга қаранг.
1. Мазкур Низомда қуйидаги тушунчалардан фойдаланилади:
қабул қилувчи ташкилот — талабалар томонидан амалиёт ўталаётган давлат ҳокимияти ва бошқаруви органи, суд, ҳуқуқни муҳофаза қилувчи орган, адвокатлик тузилмаси, хўжалик бошқаруви органи, тижорат ташкилоти, нодавлат нотижорат ташкилоти, молия-банк ва бошқа муассасаларнинг юридик хизмати, шунингдек юридик клиникалар;
амалиёт — назарий билимларни мустаҳкамлаш, амалий кўникма ва маҳорат ҳосил қилиш, амалиётда ишлашга тайёр бўлишни таъминлашга қаратилган ўқув жараёнининг бир қисми;
таништирув амалиёти — бакалавриатнинг I — III курс талабалари томонидан келажакдаги касбий фаолият ҳақида маълумотлар олиш ва назарий билимларни мустаҳкамлаш ҳамда ажратилган кредитларни ўзлаштириш мақсадида ўталадиган ихтиёрий амалиёт тури;
битирув малакавий амалиёт — таълимнинг якунловчи босқичи ҳисобланадиган ва бакалавриатнинг IV курс талабалари томонидан назарий билимларни мустаҳкамлаш ва амалиётда қўллаш кўникмаларини ҳосил қилиш орқали амалиётда ишлашга тайёр бўлишларини таъминлаш, шунингдек, битирув малакавий иши мавзуси бўйича материаллар тўплаш мақсадида ўталадиган мажбурий амалиёт тури;
стажировка — магистратура босқичи талабалари томонидан амалий кўникма ва педагогик маҳорат ҳосил қилишга қаратилган, ажратилган кредитларини ўзлаштириш мақсадида ўталадиган ихтиёрий амалиёт тури;
ОТМдан бириктирилган битирув малакавий амалиёт раҳбари — ўқув юкламасида амалиёт соати ажратилган, шунингдек битирув малакавий амалиётни ташкил этишга ҳамда уни назорат қилишга масъул бўлган ОТМ ўқитувчиси;