Ўзбекистон республикаси адлия вазирлиги

5.4. Da’voni birlashtirish va ajratish
FPKning 196-moddasiga ko‘ra, da’vogar bir arizada o‘zaro bog‘liq bo‘lgan bir necha talabni birlashtirishga haqli bo‘ladi. Bir necha talablarni birlashtirish ishda ishtirok etuvchi taraflar bir xil bo‘lganligi, dalillar umumiy bo‘lganligi munosabati bilan bir necha fuqarolik ishining tez va o‘z vaqtida samarali ko‘rilishini ta’minlaydi. Bularning barchasi sudyaning, ishda ishtirok etuvchi shaxslarning vaqtini tejaydi, sud xarajatlari ko‘payishining oldini oladi. Sud amaliyotida mehnat, turar-joy, oila huquqiy munosabatlaridan kelib chiqadigan ishlar bo‘yicha da’vogarlar bir-biri bilan bog‘liq bo‘lgan talablarni o‘zaro birlashtirishlari mumkin. Masalan, ishga tiklash, majbur bekor yurgan vaqt uchun ish haqini undirish va ma’naviy zararni undirish haqidagi yoki nikohdan ajratish va aliment undirish haqidagi talablar shular jumlasidandir.
FPKning 197-moddasiga ko‘ra, sudya shu sudda aynan bir taraflar ishtirok etayotgan bir turdagi bir necha ish yuritilayotganligini yoxud bir shaxsning turli javobgarlarga yoki bir necha da’vogarning aynan bitta javobgarga nisbatan arizalari bo‘yicha bir necha ish yuritilayotganligini aniqlasa, agar bu ishlarni birlash-tirish ishning o‘z vaqtida va to‘g‘ri hal qilinishiga yordam bersa, ularni birgalikda ko‘rish uchun bitta ishga birlashtirishga haqli bo‘ladi.

Sudya bir necha talablarni birlashtirish huquqiga ega bo‘lganidek, unga bunday talablarni ajratish huquqi ham beriladi. FPKning 198-moddasiga ko‘ra, agar arizani qabul qilayotgan sudya talablarni alohida ko‘rishni maqsadga muvofiq deb topsa, birlashtirilgan talablardan birini yoki bir nechasini alohida ish yuritish uchun ajratishga haqli.

Bir necha da’vogar tomonidan yoki bir necha javobgarga nisbatan talablar qo‘zg‘atilsa, arizani qabul qilayotgan sudya, agar talablarni alohida ko‘rib chiqishni maqsadga muvofiq deb topsa, ulardan biri yoki bir nechasini alohida ish yuritish uchun ajratishga haqli.