Замонавий қурилиш материаллари, буюмлари ва технологиялари

2.4. Шишапрофилитлар
Шишапрофилитлар – узлуксиз прокатлаш орқали тайёрланган шаффоф ёки рангли профилли шишалардир. Улар юзаси текис, тарам-тарам ботиқ ёки бўртма чизиқли, абсолют шаффоф ёки хира бўлиши мумкин. Яна конструкцияга юқори мустаҳкамлик бериш мақсадида металл тўр билан арматураланган шишапрофилитлар ҳам ишлаб чиқарилиши мумкин. Улар қалинлиги 6-7 мм, эни 250 ёки 500 мм, узунлиги эса 7000 ммдан ошмаган тахтачалар кўринишида ишлаб чиқарилади (23-24 расмлар).
Бу материалдан биноларда нур ўтказувчи ва тўсувчи ички конструкцияларда ва фасадларни пардозлашда фойдаланилади.

23- Шишапрофилитларнинг турлари
	24-Шишапрофилитли тўсиқларнинг конструкциялари

Билимни мустаҳкамлаш учун саволлар:

1. 
   Шиша ишлаб чиқаришнинг замонавий усули хақида нималарни биласиз?
   
2. 
   Шиша ишлаб чиқаришнинг технологик жараёни хақида гапириб беринг.
   
3. 
   Шишапакет нима?
   
4. 
   Шишапакет қандай тайёрланади?
   
5. 
   Шишапакетнинг иссиқлик ўтказувчанлиги нималарга боғлиқ?
   
6. 
   Шишапакет тайёрланаётганда нима учун силикагелдан фойдаланилади?
   
7. 
   Триплекс нима?
   
8. 
   Шишапрофилит нима?
   
9. 
   Шишаблоклар қандай тайёрланади?
   
10. 
    Шишадан қандай қурилиш буюмлари тайёрланади?
    

3. МИНЕРАЛ БОҒЛОВЧИ МОДДАЛАР

Сувда қорилганда пластик хамир ҳолига келиб, секин аста қуюқлашиб, пировардида тошдек қотадиган, майда қилиб туйилган материаллар боғловчи минерал моддалар деб аталади.

Классификациялашда қурувчилар учун боғловчи модданинг хоссалари муҳим аҳамиятга эга. Боғловчи моддаларнинг баъзилари ҳавода қотади, баъзилари эса ҳам ҳавода, ҳатто сувда ҳам қотади. Улар шу белгисига қараб ҳавои ва гидравлик боғловчи моддаларга бўлинади.
Ҳавои боғловчи моддалар фақат ҳавода қотади ва бу шароитда мустаҳкамлигини узоқ вақт сақлайди. Бу гуруҳга ҳавои оҳак, гипс, магнезиал боғловчи моддалар, ҳамда суюқ шиша киради.
Гидравлик боғловчи моддалар нафақат ҳавода, балки сувда ҳам қотади, узоқ вақт мустаҳкамлигини сақлайди ёки оширади. Бу гуруҳга гидравлик оҳак, портландцемент ва унинг турлари, гилтупроқли цемент, куйдирмасдан олинадиган ишқорли цементлар ва бошқалар киради.