Yozuvchi kim aslida? U qanday bo’ladi? Qo’liga qalam tutgan har qanday kishi yozuvchi bo’la oladimi?

Yozuvchi kim?
Yozuvchi kim aslida? U qanday bo’ladi? Qo’liga qalam tutgan har qanday kishi yozuvchi bo’la oladimi?
Yozuvchi. Ko’z o’ngimizga qalami qog’ozda, xayoli esa allaqayerdagi bir shaxs gavdalanadi. U qalamning shunday karomati borki, xayol kuchini haqiqatga aylantira oladi. Xuddi sehrgarning sehrli tayoqchasi bo’lgani kabi yozuvchining ham o’tkir qalami bo’ladi. Bu qalam umidsizlarga umid, baxtsizlarga baxt, zulmatga yorug’lik baxsh eta oladi. Singan ko’ngillarga malham bo’la oladi. Qalamning qudrati shu darajada yuksakki, agar u ezgu yo’lda foydalanilsa, hayotida mazmun yo’qolgan kishini qayta hayotga bog’laydi. Demak, shunchalik qudratga ega qalam sohibi ham anoyi shaxs emas. Bunday qudratni boshqara olish ham bir san’at. Yozuvchi shundayin san’atkordir. U kichik xayollardan ulkan hayotlar yaratadi. Yaratgan hayotini qalbimizga joylaydi va u hayot biz bilan birgalikda yashashni davom etadi. Yozuvchi yaratgan hayot asar deb nomlanadi.
Xo’sh, endi savol: faqatgina asar yaratadigan shaxs yozuvchi bo’la oladimi?
Bu juda tor ma’nodagi xulosa. Aslida qalam tutmagan har qanday shaxs yozuvchidir. Oddiy haydovchi ham, shifokor yoki bozordagi aravakash ham yozuvchi. Hatto buyuk yozuvchi. Chunki ular hayot daftarini yozishadi. Ularning qolgan yozuvchilardan farqi shundaki, ular qalam bilan yozishmaydi, balki hayot kitobini yashab yozishadi. Kitobdagi har bir onni yashashadi, hamda dunyo-dunyo quvonch, hayajon,dard va qolgan jamiki hislarni tuygan holda.
Xulosa shuki, siz ham, biz ham yozuvchimiz. Asarimizning mazmunli va ta’sirli chiqishi boshimizdan kechirgan voqealarga bog’liqdir. Hayot kitobingizni mazmunli jumlalar bilan to’ldiring, toki o’quvchi sizning asaringizdan dars olsin.


Kushaliyeva.